18 sterf toe skoolbus en taxi reg van voor bots
2012-07-21 23:52
- Artikelopsies
- Deel
- Kry Rapport op
18 mense, onder wie ’n gr. 3-leerling aan die Laerskool Cradock en dié skool se hoof, Wimpie van der Merwe (51), is dood en talle beseer toe ’n skoolbus en ’n minibus-taxi gister in die Oos-Kaap gebots het.
14 mense het in die taxi gesterf, onder wie die bestuurder. Twee van die vier beseerdes wat in die hospitaal opgeneem is, is later dood.
Die skoolbus en die minibus-taxi het omstreeks 07:00 op die R61 tussen Cradock en Graaff-Reinet reg van voor teen mekaar gebots, het ao. Cynthia Mkamba, polisiewoordvoerder, gesê.
Jurie Taljaard, ’n onderwyser aan die Hoërskool Cradock wat op die toneel afgekom het, het gesê die skool en gemeenskap is verslae.
“Dit was verskriklik. Daar was hierdie ongeloof oor wat gebeur het. Die kinders was baie ontsteld en mense was verbouereerd.
“En die eerste gevoel wat jou tref, is daardie vrees wat jy as onderwyser het om met skoolkinders in ’n ongeluk te beland.”
Die bus van die Laerskool Cradock was op pad na ’n sportbyeenkoms by die Laer Volkskool op Graaff-Reinet en die taxi was van Kaapstad na Mthatha onderweg.
Volgens Mkamba het die taxi ’n ander taxi op ’n blinde hoogte verbygesteek en toe die skoolbus getref. 16 van die oorledenes is almal op die toneel dood, het Tshepo Machaea van die organisasie Arrive Alive gesê.
“Baie van die passasiers was vasgekeer en reddingswerkers moes hulle red,” het Machaea gesê.
Tien mense is steeds in die hospitaal en ’n verdere 28 is vir ligte beserings behandel en ontslaan.
Twee onderwysers aan die Laerskool Cradock is met ernstige beserings in hospitale in Port Elizabeth opgeneem en twee ander in Bloemfontein.
Die skool het gister in ’n SMS aan ouers gesê die skool sal Maandag gesluit wees omdat talle personeellede beseer is.
Troosboodskappe het intussen ingestroom op die Facebook-profiele van Van der Merwe se familie.
Hy was sedert Januarie 2009 skoolhoof in Cradock. Hy word oorleef deur sy vrou, Elsabé, seun, Luwaldo, en drie stiefkinders. Hulle is Charles, Theo en Elsa Ferreira.
Die pad is gister vir verkeer gesluit.