20% van leerlinge in gr. 10, 11 is herhalers

Meer as 20% van leerlinge wat die afgelope twee jaar in gr. 10 en 11 was, was besig om dié grade te herhaal.

Kenners meen skole wat swak leerlinge terughou om hul matriekslaagsyfer te verbeter, kan ’n rede wees.

Annette Lovemore, DA-skaduminister van basiese onderwys, het deur vrae in die parlement syfers van herhalers die afgelope twee jaar gekry.

Dit was die hoogste in gr. 10 en 11.

Sy sê ’n hoof van ’n skool waar die matriekslaagsyfer van 46% in 2009 tot 76% in 2011 verbeter het, het onlangs aan haar erken hy hou moontlike druipelinge terug.

“Hy het leerlinge wat gr. 11 vir die derde of vierde keer herhaal.”

Die departement van basiese onderwys sê volgens sy beleid is die norm dat ’n leerling saam met sy ouderdomsgroep moet vorder en net een keer in ’n onderrigfase (waarvan daar vier is) ’n graad mag herhaal.

Nic Spaull, navorser in ekonomie aan die Universiteit van Stellenbosch, sê die herhaal van ’n graad sal waarskynlik dieselfde resultate as die vorige jaar oplewer as daar nie aan die redes vir probleme aandag gegee word nie.

“Die werklike probleem lê in die vroeër grade.”

Volgens Spaull leer kinders dan nie die nodige vaardighede aan nie en boonop is daar nie in dié grade eksamens wat, soos in matriek, ekstern geëvalueer word nie.

“Leerlinge neem hul leergebreke saam met hulle soos wat hulle deur die grade gestoot word, net om in gr. 11 of 12 te druip.

“Die oplossing is egter eerder ’n vorm van remediërende onderrig.”