6 sterf in hitte tydens toetse vir verkeerslui

Ses mense is waarskynlik aan hitte-uitputting dood nadat duisende Donderdag in ’n fiksheidstoets meegeding het om 90 poste as verkeersbeamptes in Kwa­Zulu-Natal.

Radley Keys, DA-woordvoerder oor vervoer in dié provinsie, sê die departement van verkeer het sowat 150?000 aansoeke gekry.

Van hulle is 34 000 mense gekortlys.

“Hulle (die departement) het heeltemal verkeerd te werk gegaan met die aanvanklike advertensie. Die enigste kwalifikasies was dat jy jonger as 35 jaar moet wees en ’n ID, matrieksertifikaat en rybewys moet hê.

“Dis asof hulle nie besef het hoe kritiek die werkloosheidsyfer in die land is nie.”

Hy sê sowat 17 000 mense het Donderdag van oor die provinsie in die hitte by die Harry Gwala-stadion in Pietermaritzburg opgedaag om 4 km in minder as 25 minute te probeer aflê.

“Ek was self daar. Dit was 31 °C en die meeste van die mense het daar aangestap gekom. Hulle moes toe in lang toue staan voordat hulle eers die middag kans gekry het om te hardloop. Ek glo die meeste was toe al ontwater,” sê Keys.

Hy sê daar was geen waterpunte langs die pad nie en talle mense het flou geword weens die hitte.

Daar was glo paramedici en water by die eindpunt.

“Mens sou dink dat in ons provinsie, waar ons die Com­rades en ander marathons hou, so iets beter gereël sou word.”

Behalwe vir die ses wat vermoedelik aan hitte-uitputting dood is, het ’n sewende later uit “frustasie” selfmoord gepleeg, het die SAUK gister berig.

Keys sê daar het eergister wéér sowat 17 000 mense opgedaag, maar gelukkig was dit bewolk en heelwat koeler.

Hy sê sowat 2 000 mense het gister by die Mkondeni- en Northdale-toetsstasies aan ’n bestuurstoets deelgeneem.

“Hoe kan jy ’n kortlys van 34 000 mense hê vir net 90 poste? Die maksimum moes 5?000 gewees het.”

Die departement van vervoer kon nie gister vir kommentaar bereik word nie.