Aarya? Aarnee vir MasterChef
2013-01-20 01:07
- Artikelopsies
- Deel
- Kry Rapport op
Deena Naidoo, wenner van verlede jaar se MasterChef SA, vat kritiek teen sy restaurant met ’n knippie sout.
Aarya het in November verlede jaar in Montecasino, Fourways, noord van Johannesburg, geopen.
Naidoo het gister uit Durban, waar hy steeds woon, gesê 90% van sy gaste was tot dusver baie tevrede. Sommige van die ontevrede 10% was so ontevrede dat hulle op sosiale platforms uitgevaar het.
Hulle kla oor koue kos, swak diens en ’n beperkte spyskaart.
Denise Francis van Johannesburg is een van die ontevrede gaste.
“Die spyskaart is baie beperk. Elke keer as ons iets gekies het, het ons gehoor daar is nie bestanddele vir dié gereg nie,” sê sy.
“Daar was nie bestanddele vir melkskommel nie en daar was ook nie garnale nie. Die kelner het toe vir ons gesê hulle het nie bestanddele nie omdat dit ’n Sondagaand is.
“Die diens was uiters swak. Ek het net gegaan omdat my vriende voorheen daar was.
“Ek sal nog een keer in die toekoms gaan, want dalk doen Deena iets om die plek reg te ruk,” sê Francis.
Ander gaste sê hulle sal nooit weer by Aarya eet nie.
’n Klaer wat haar as Natalie geïdentifiseer het, sê op food24.com dit was haar slegste ervaring in ’n restaurant.
“Ek sal verbaas wees as dié restaurant se deure nog teen die einde van 2013 oop is.
“Die diens is stadig, die kos smaak en lyk sleg en die dekor is verskriklik.”
Remendran Munthree sê op www.eatout.com hy is baie teleurgesteld in die kos.
“Dis meestal vooraf berei en net warm gehou.”
Naidoo werk by die IT-afdeling van Nedbank in Durban en is nie heeltyds in Johannesburg nie.
“Ek is gewoond aan moeilike klante omdat ek die afgelope 20 jaar by Nedbank met hulle gewerk het. Dit is almal se reg om te kla, want hulle betaal vir die kos. Ek verwag dat hulle waarde vir hul geld kry, al is ek nie daar nie.”
Daar was omstredenheid toe dit aan die lig gekom het die restaurant sou nie Deena se eiendom word nie.
Naidoo sê Tsogo Sun, eienaars van die restaurant in Montecasino, help met die bestuur daarvan.
Hy het ook ’n bestuurder en ’n hoofsjef aan die stuur van sake.
“Ek praat elke dag met hulle om seker te maak alles is in orde. Ek het ook ’n uitstekende kombuisspan.
“Ek het self die spyskaart opgestel. Ek wou ’n familie-restaurant skep waar elke Suid-Afrikaner welkom voel.
“Ons het ons eie kos-kultuur in Suid-Afrika en ek wou dit uitbring in Aarya.”
Die spyskaart sal mettertyd verder ontwikkel word, sê hy.