Afgestorwe Sisulu “kon lag’
2012-10-13 23:19
Die oud-joernalis en voormalige direkteur van die SABC, Zwelakhe Sisulu, is gister vanuit die Walter Sisulu-saal in Randburg onthou vir meer as net die revolusionêr, die joernalis of die sakeman.
Sisulu was iemand wat kon lag.
Huldeblyke is uitgespreek deur naasbestaandes, met geel rose aan hul lapelle vas.
Onder dié wat huldeblyke gelewer het aan Sisulu, wat laasweek Donderdag in sy slaap oorlede is, was sy broer Max, Speaker van die parlement, en dié se seun, Shaka.
“Hy het altyd gelag, maar daar was so baie dink agter daardie lag,” was hoe laasgenoemde Sisulu sy oom onthou het.
Pres. Jacob Zuma, vergesel deur adj.-pres. Kgalema Motlanthe en sy kabinet, het die afgestorwe seun van oud apartheidstryders, Walter en Albertina Sisulu, “’n kind van die struggle genoem.”
Sisulu, wat as ’n intern by die Rand Daily Mail sy vaardigheid as joernalis begin skaaf het, het in die laat 1980’s sy merk gemaak in die alternatiewe media as stigter en redakteur van The New Nation.
Sy struggle-tyd by The New Nation het onder meer daartoe gelei dat hy geteister is, sowel as tronkstraf uitgedien het. Sisulu het egter nooit enige illusies daaromtrent gehad nie, vertel vriend Vusi Kanyile. “Wanneer die oomblik op sy ergste is, moet jou waagmoed op sy beste wees,” het Kanyile vertel.
Sisulu word oorleef deur sy vrou Zodwa, seuns Moyikwa en Ziyeka, dogter Zoya en kleindogter Lilitha.