Afrikaanse skatte op internet
2010-05-08 22:29
Marlene Malan in Kaapstad
Stokou Huisgenote en ander tydskrifte soos Die Brandwag, Ons Eie Boek en Die Unie, sowel as talryke ander Afrikaanse publikasies wat van 1913 dateer, is ná 16 jaar se geswoeg en gesweet nou wêreldwyd elektronies beskikbaar.
Dié waardevolle stukke is deel van die Bibliografie van die Afrikaanse Taal en Letterkunde (BATL) en kan op die internet gelees word.
Prof. Wannie Carstens van die Noordwes-Universiteit se Potchefstroom-kampus staan aan die spits van die projek.
Hy sê die BATL is saamgestel in navolging van die Nederlandse Bibliografie van Taal en Letterkunde (BNTL), wat al jare lank toegang tot argiefstukke vir leesgieriges en akademici vergemaklik.
“Die plan was van die begin af om die Afrikaanse weergawe te skoei op die ooreenstemmende Nederlandse werk.
“Aanvanklik het ons saamgewerk met die Koninklijke Bibliotheek in Den Haag. Daarna het ons die BATL deel van die BNTL gemaak.
“Ons het ook saam met dr. Karina van Dalen en mev. Elly Kamp van die Huygens Instituut in Den Haag gewerk.”
’n Skakel na die BATL is ook geplaas op die BNTL se webblad – wat in 2008 in digitale formaat beskikbaar gestel is.
Carstens sê die idee het ontstaan ná ’n versoek van ’n Nederlandse taalkundige wat gekla het dat hy te min Afrikaanse publikasies in die hande kan kry.
“Dit is byvoorbeeld nie geredelik beskikbaar in biblioteke in Nederland en Vlaandere nie en daarom word Afrikaanse bronne dikwels geïgnoreer in akademiese geskrifte.
“Ek en prof. Dorothea van Zyl van die Universiteit van Stellenbosch het besluit om dit ons langtermynprojek te maak.”
Afrikaans is dus nou wêreldwyd beskikbaar aan enigeen wat toegang het tot die internet.
Verwysings na boeke, akademiese artikels, verhandelinge, proefskrifte, tydskrifartikels en koerante kan gelees word met die druk van ’n paar toetse op ’n toetsbord, sê Carstens.
“Die elektroniese bibliografie verhoog beslis Afrikaans se aansien in ander wêrelddele.
“Dis omdat mense nie ons bronne in die hande kon kry nie dat hulle nie self kon ervaar watter waarde ons taal tot die akademiese gesprek kon toevoeg nie,” sê Carstens.
“Nou eers kan die hele wêreld ten volle besef dat Afrikaanses eintlik al baie jare lank gehaltewerk in Afrikaans lewer!”
* Verkry toegang tot die BATL by die webadres http://www4-win2.p.nwu.ac.za/dbtw-wpd/textbases/BATL.htm.
- Rapport