Arbeidsminister gee Woolies ’n skouerklop
2012-09-09 01:07
- Artikelopsies
- Deel
- Kry Rapport op
Julian Jansen in Kaapstad
Die minister van arbeid, Mildred Oliphant, het die kleinhandelgroep Woolworths geloof vir sy “onwrikbare poging om werklik transformasie in die werkplek te takel deur die implementering van gelyke indiensneming”.
Oliphant het gereageer nadat die vakbond Solidariteit ’n openbare boikot-aksie teen Woolworths begin het.
Sy sê daar is baie (individue en groepe) wat fout wil vind met diegene wat werklik gelyke indiensneming wil bevorder.
Die Solidariteit-boikot-aksie was in reaksie op advertensies op die Woolworths-webwerf wat aangedui het dat sekere poste in die groep slegs vir swart aansoekers beskore was.
Solidariteit het Woolworths uitgedaag om sy beleid van absolute verteenwoordiging op grond van die land se rassedemografie in die arbeidshof te verdedig. Woolworths was een van ’n paar groot indiensnemers op die Johannesburgse Effektebeurs (JSE) wat in 2009 onderworpe was aan die oorsig van die direkteur-generaal (DG) in terme van artikels 43 tot 45 van die Wet op Gelyke Indiensneming (1998).
Woolworths het Donderdag sy Facebook-blad gesluit omdat dit “niks anders geword het nie as ’n platform vir ’n goed georkestreerde veldtog van haatspraak”.