Balju lê besoek af by Malema
2012-10-07 00:21
- Artikelopsies
- Deel
- Kry Rapport op
Sipho Masondo in Johannesburg
Die balju van die hooggeregshof het eergister by die huis van Julius Malema in Florapark in Polokwane aangeklop om ’n inventaris van sy eiendomme en bates op te stel.
City Press, susterkoerant van Rapport, het vertroulik verneem dié besoek kom kort nadat die Suid-Afrikaanse Inkomstediens (SAID) ’n vonnis van R16?miljoen teen dié uitgeskopte ANC-jeugleier bekom het weens onbetaalde belasting, boetes en rente.
Die vonnis is nie verwant aan die aanklagte van geldwassery teen Malema nie.
Die SAID lê beslag op belastingbetalers se bates wanneer hulle versuim om belasting te betaal of nie al hul inkomste verklaar nie.
Nicqui Galaktiou, Malema se prokureur, was onbewus van die balju se besoek, maar ’n lid van die ANC in Limpopo se provinsiale uitvoerende komitee het dit bevestig.
“Malema was self nie daar nie. Hulle was bykans ’n uur in sy huis.”
Hoewel die balju op geen van sy besittings beslag gelê het nie, word Malema verbied om enigiets te verkoop wat op die inventaris verskyn. “Hy mag nog in sy bed slaap,” sê ’n ander bron.
* City Press het verneem Malema sal nou met die SAID oor die vonnis van R16 miljoen onderhandel.
Adrian Lackay, SAID-woordvoerder, het geweier om kommentaar te lewer.