Bam onttrek sodat sy glo borste kan vergroot
2012-07-09 07:50
Melinda Bam, Mej. SA, spog dalk een van die dae met groter borste.
Die kosmetiese operasie is glo die rede waarom Bam (23) verlede week skielik aan die Mej. Wêreld-kompetisie onttrek het.
Bam en haar woordvoerders het toe gesê sy onttrek om “persoonlike redes” en wou geen woord verder rep nie.
Die skoonheidskoningin het glo al ’n voorste plastiese chirurg oor ’n borsvergroting genader.
Sy het die saak ook met haar voorgangers, Cindy Nell en Nicole Flint, bespreek.
Met ’n groter bra-grootte het die 1,7 m lange skoonheid dalk ’n groter kans om in Desember as Mej. Heelal gekroon te word.
Die Amerikaanse magnaat Donald Trump besit dié skoonheidskompetisie en dit word as sexier as Mej. Wêreld beskou.
’n Bron na aan die Mej. SA-kompetisie het die nuus oor die beplande operasie uitgelap.
“Sun International gee haar genoeg tyd om die chirurgie te laat doen sodat sy die hele pakket het vir die skoonheidskompetisie in Desember. Haar ouers betaal vir die operasie.”
Bam het dit eers ontken: “Wat? Ek? Nee, nie ek nie!”
Later het sy teruggekrabbel: “As jou bronne Cindy Nell en Nicole Flint is, dan ja.
“Ek het gesê ek wil graag my borste vergroot, maar ek het nooit gesê ek gaan dit doen nie. Medies gesproke kan ek nie. En my pa sal nie daarvoor betaal nie, hy betaal klaar vir my suster se troue.”
Toe Bam haar verlede week aan die Mej. Wêreld-kompetisie onttrek het, is selfs bespiegel dat dié stap met kaalfoto’s te doen het.
Sue Klerck, woordvoerder van Sun International, het dié gerugte as “belaglik” afgemaak.
Die gerugte raak al hoe erger, sê Bam die afgelope week.
“Dit raak nou lagwekkend. Ek het nog nooit vir kaalfoto’s geposeer nie.”
Bam se eerste prinses, Remona Moodley, neem in haar plek aan die Mej. Wêreld-kompetisie deel.
As Bam wel haar borste laat vergroot sal sy nie die eerste skoonheidskoningin wees wat dit doen nie.
In 1983 het Debra Maffett, Mej. Amerika, ’n skandaal ontketen toe sy erken het sy het plastiese chirurgie aan haar neus en borste gehad.
Juliana Borges, die Brasiliaanse skoonheid wat in 2001 aan die Mej. Heelal deelgeneem het, het 19 plastiese chirurgiese prosedures ondergaan.