Beleggers verloor R500 milj.
2010-02-06 23:17
’n “Reuse-bedrogspul” het honderde mense se spaargeld ingesluk en selfs bekendes soos die oud-Springbok Joost van der Westhuizen byna om die bos gelei.
Sover bekend is R500 miljoen in dié vragmotorskema belê, maar insp. Kobus Vlok, ondersoekbeampte, het Vrydag aan Rapport gesê dié bedrag groei by die dag.
Me. Yolanda Visser (35) is die baasbrein van die beweerde bedrognetwerk, het die Pretoria-Noord-streekhof vandeesweek gehoor. Sy, haar man, Conrad (35), en mnre. Abram Fourie (41) en Carl Uys (35) staan voorlopig tereg op minstens 300 aanklagte van bedrog en diefstal.
Streeklanddros Ben van Schalkwyk het Woensdag hul aansoek om borgtog van die hand gewys omdat hulle ’n vlugrisiko is.
Die hof het gehoor hoe mense bedrae van R25?000 betaal het sodat Truckbond en/of Tswella Facilitators finansiering vir vragmotors kon reël.
Mnr. Phillip Nelson, ’n private speurder van Proselect Crime Investigations, het aan Rapport gesê hulle het op ’n ongetekende kontrak tussen die beskuldigdes en Van der Westhuizen afgekom. Dié kontrak is in die naam van JQ Bulk Carriers (Edms.) Bpk, wat aan dié oud-Bok en ’n vennoot behoort.
“Ek is ’n entrepreneur, ek kyk na sakegeleenthede en doen navorsing daaroor,” het Van der Westhuizen Vrydag aan Rapport gesê.
“Ek het Yolanda een keer ontmoet toe ek soontoe is en hulle ons mynvervoerkontrakte aangebied het. Gelukkig het ek nie ’n sent belê of ’n kontrak geteken nie. Alles was net te goed om waar te wees.
“Al wat ek verloor het, was die petrolgeld wat ek uitgery het.”
Beleggers is glo hul eie vragmotor belowe wat dan gebruik sou word om groot geld te verdien uit vooraf gereëlde vervoerkontrakte met ander maatskappye.
Vlok sê die “kontrakte” wat aan beleggers gewys is, was vals. Beleggers het ook nie hul vragmotors gekry om te begin karwei nie.
Wanneer hulle navraag gedoen het oor die oponthoud, het Visser-hulle glo selfs sover gegaan om te reël dat vragmotors geleen word om die beleggers te flous.
Die beleggers kon dan ’n foto van hulself by dié foefie-vragmotors neem en ’n glasie vonkelwyn klink op die reuse-opbrengste wat hulle sou verdien. Die vragmotors is daarna weer na die handelaars teruggeneem.
Vlok het aan Rapport gesê hy kry gereeld oproepe en SMS’e van woedende beleggers wat hul spaargeld, pensioen en selfs huise verloor het. Aan die ander kant het Visser glo tot R100 000 per dag op luukshede spandeer.
“Hulle (beleggers) wil die mense doodmaak. Dis maar goed hulle sit nog in die tronk.”
- Mense wat geld in Truckbond of Tswella belê het kan Vlok bel by 082 869 2508.
- Rapport