Beraad oor Afrikaans ‘spierwit’
2012-08-18 23:49
Die Stigting vir Bemagtiging deur Afrikaans (SBA) is op die oorlogspad omdat bruin mense glo uitgesluit is van ’n konferensie oor die toekoms van Afrikaans.
Die FAK en die Vereniging van Regslui vir Afrikaans het Dinsdag in Pretoria ’n beraad aangebied “om strategies oor die plek van Afrikaans op vele lewensterreine te besin”. Geen organisasies met ’n fokus op bruin sprekers van die taal is egter uitgenooi nie.
’n Spierwit gehoor van sowat 100 het die konferensiesaal in Garsfontein volgepak.
Danie van Wyk, uitvoerende hoof van die SBA, het die FAK van “laer trek” beskuldig en aan Rapport gesê dit is ’n jammerte ander organisasies in die Afrikaanse gemeenskap is uitgesluit.
“Afrikaans behoort aan álle Afrikaanssprekendes. Die FAK is met sulke konferensies besig om laer te trek.”
Van Wyk het verneem daar is op die FAK-konferensie selfs verwys na die stigting van ’n Afrikaanse stad. “Dit wys net weer daar word terugbeweeg na die mentaliteit waarmee Orania destyds gestig is.”
Op die vraag of organisasies wat bruin Afrikaanssprekers verteenwoordig ook na die konferensie genooi is, het dr. Danie Langner, uitvoerende hoof van die FAK, gesê: “Ons het die SA Akademie, die Afrikaanse Taalraad en die ATKV genooi. Almal was teenwoordig.”
Onderwerpe soos Afrikaans as ideologiese taal- en kultuurbedding, Afrikaans in die burgerlike gemeenskap, wetgewing wat die openbare gebruik van Afrikaans afdwing, Afrikaanse opleiding en Afrikaans in die media is bespreek. Voorts was die nuwe taalwet asook ’n Afrikaanse stad as voorwaarde vir die blywende stabiliteit en groei van Afrikaans op die agenda.
’n Verslag, “Toekoms in eie taal”, wat deur prof. Jaap Steyn en Langner vir die N.P. van Wyk Louw-navorsingsentrum van die FAK opgestel is, is ook bekend gestel.
Luidens dié verslag word Afrikaans bedreig deur die ANC-regering se beleid, soos regstellende aksie, en sy gewoonte om hom met alle vlakke van die samelewing te bemoei. Die verslag voeg by Afrikaans kan nie bekostig om nóg sy bruin sprekers nóg sy wit sprekers te verloor nie.