Biko jr. sê nee dankie vir politiek
2013-02-23 23:04
Is die ANC in ’n krisis?
Mense se belange is ondergeskik gestel aan partylojaliteit, waar jy vandaan kom en bande met verskillende leiersgroeperings. Selfs die grootste ANC-ondersteuners moet erken die party het hulle teleurgestel deur nie sy beste voet voor te sit nie.
Dink jy jou ma se platform, Agang, is ’n moontlike bedreiging vir die ANC?
Dit hang af van hoe jy sukses by die stembus meet. Die langtermynsukses van enige opposisieparty moet gemeet word aan sy vermoë om met ander opposisiepartye saam te werk as ’n georganiseerde koalisie.
Ek dink ook dis te vroeg om te sê. Dit hang af van hoe opposisiepartye oor mekaar voel, of hulle konsensus kan bereik oor ’n stel waardes wat hulle kiesers kan bied.
Dit hang af of hulle verby die nóú kan kyk en kan dink aan ’n tasbare opposisie vir ’n tweepartystelsel. Dit het elders in die wêreld gewerk.
Is jou ma die beste persoon om dié skuif te dryf?
Ek is heeltemal bevooroordeeld. Ek dink dit gaan oor geloofwaardigheid en as ander meen sy het geloofwaardigheid om die rol in te neem van ’n senior persoon in die koalisie, dan great.
Sal jy aansluit?
Nee. Ek is gevestig in die sakewêreld. My grootste bydrae is om mediumgrootte maatskappye te help groei. Van ons moet entrepreneurs – wat groot risiko’s loop – ondersteun. Ek is mal daaroor en goed daarmee.
Was jy verbaas oor jou ma se besluit om die politiek te betree?
Ek glo daar is ’n keerpunt vir mense wat die politiek betree.
Ek dink sy het ’n spirituele pad gestap wat haar tot die punt gebring het waar sy gevoel het sy moet leierskap bied in ’n politieke omgewing, want sy het (reeds) heel suksesvol leierskap getoon in ander arenas.
Sy betree dit met haar oë oop. Ek bewonder haar, maar dis nie lekker om te sien hoe iemand vir wie jy lief is, deurgaan wat sy nou sal deurmaak nie. Maar sy voel geroepe om dit te doen.
So jy sal nie vir hulle ’n tjekkie uitskryf nie?
Ek dink nie hulle het ’n tjek van my nodig nie; hulle het meer Suid-Afrikaners nodig wat betrokke raak. Geld is ’n klein deel van politiek.
Dis meer oor mense aan boord kry en om die boodskap te verkondig.