Blindes dalk rottang-inkomste kwyt
2013-01-05 23:22
’n Groot getal gesiggestremde mense kan sonder ’n inkomste gelaat word weens ’n onverklaarbare invoertekort aan rottang.
Lizelle van Wyk, uitvoerende hoof van die Kaapstadse Vereniging vir Blindes (KVB), sê Suid-Afrika se blinde rottangvlegters sit met ’n krisis.
“Ons het geen idee hoekom die Indonesiese regering ’n moratorium op die uitvoer van rottang geplaas het nie.”
Sy het bevestig die kantoor van Alan Winde, Wes-Kaapse LUR vir finansies, ekonomiese ontwikkeling en toerisme, het haar belowe sy kan Winde nog voor einde vandeesmaand sien om antwoorde te probeer kry.
“Daar is ongeveer 28 soortgelyke werkwinkels wat in die land geraak word,” sê Van Wyk.
“Die getal blindes per werkwinkel wissel tussen 50 en 100 mense. Maar dis moeilik om presiese getalle vas te stel, aangesien almal nie met rottang werk nie.”
Volgens haar is daar sowat 1,2 miljoen gesiggestremde mense in Suid-Afrika.
“Rottangwerk is nie net ’n tradisionele ding wat al jare lank met blindes geassosieer word nie; dis ook ’n groot bron van inkomste vir hulle.”
Die onderskeie verenigings oor die land heen voer jaarliks saam meer as 50 t rottang van Indonesië, Maleisië en Viëtnam in.