Bok-boek gaan die ore laat brand
2009-11-15 00:09
- Artikelopsies
- Deel
- Kry Rapport op
Sporthelde se outobiografieë is maar alte dikwels veel lawaai en weinig wol.
’n Mens het egter rede om te vermoed dat die Springbok-kaptein, John Smit, ’n bietjie meer vir homself te sê sal hê – en Captain in the Cauldron, geskryf saam met die gerekende Durbanse rugbyskrywer Mike Greenaway, stel nie teleur nie.
Smit se loopbaan het meer opdraande en afdraande gehad as die meeste s’n. Sedert hy as jong vaskopstut ’n dekade gelede Suid-Afrika se o.21-span aangevoer het na die wêreldkroon in dié ouderdomsgroep, is hy as’t ware grootgemaak om eendag Springbok-kaptein te word.
Deesdae is hy een van die gewildste sportmanne in die land, maar hy het stories te vertelle oor vrot veldtogte en suksesvolles, politieke inmengery en vriendskappe soos min ander sportlui in die wêreld kan hê.
En Smit spaar nie die perde nie; ook nie homself nie.
Die uwe se oë het die wydste gerek vir Smit se taamlik volledige relase oor die berugte Kamp Staaldraad, wat afgespeel het voor die triestige Wêreldbeker-veldtog van 2003 en waartydens die koeëls oor die Springbokke se koppe gefluit het toe hulle uit ’n yskoue dam probeer stap het.
Smit se eerlike mening oor dié aangeleentheid is dat hy as persoon waarskynlik sterker anderkant uitgekom het en dat dié soort ervaring sekerlik karakter vorm, maar dat dit hoegenaamd g’n manier is om ’n rugbyspan te brei vir ’n wêreldtoernooi nie.
Daar is al gerugte die wêreld in oor die boksgevegte wat die Bokke met mekaar moes hê. Dat Selborne Boome swaar geleef het teen Danie Rossouw is seker nie ’n verrassing nie, maar die relaas oor hoe Breyton Paulse gedwing is om met Derick Hougaard af te reken sal wyer ontstel as net in Pretoria.
Die omstrede insluiting van Luke Watson weens politieke druk word ook breedvoerig bespreek en Smit vertel die meeste van wat hy daarvan weet. Watson is glo as Bok ingewy, maar eers ’n ruk ná sy eerste toets, en die versuim om dit met die intrapslag te doen was bloot logistiek. Watson loop egter deur.
Smit vertel van sy ontsteltenis toe dié losvoorspeler langs hom sit en SMS’e stuur terwyl ’n emosionele Percy Montgomery sy uittrede aan die span bekend maak voor verlede jaar se Ellispark-toets teen Australië.
Hy vertel ook van die spanpraatjie waartydens hy, met Watson teenwoordig, gewag daarvan gemaak het dat 21 van die spanlede mekaar as familie beskou en deur die vuur vir mekaar sou loop – en nie moes toelaat dat die 22ste ou in die groep dit vir die res bederf nie.
Hoe geheg dié besondere groep Springbokke aan mekaar is, is waarskynlik die belangrikste tema in die boek en dis dié amperse familieband, ewe veel as hul talent, wat hulle tot ’n gedugte eenheid omgetower het.
Captain in the Cauldron sal mense aan die praat kry en ’n hele paar ore laat brand.
- Rapport