Brekfis vir R37 m.
2013-01-20 00:02
- Artikelopsies
- Deel
- Kry Rapport op
Drie van die land se grootste maatskappye in staatsbesit dok miljoene rande op om sake-ontbyte van die Gupta-familie, boesemvriende van pres. Jacob Zuma, te finansier.
Die Guptas is die eienaars van die koerant The New Age, wat by sy reeks sake-ontbyte al gasheer was vir sprekers soos Zuma, Jeff Radebe, minister van justisie, en Malusi Gigaba, minister van openbare ondernemings.
Transnet het al R17,5 miljoen vir 18 ontbytsessies opgedok, Eskom het tussen November en einde verlede jaar R7,2 miljoen betaal om ses sessies (teen R1,2 miljoen elk) te borg; en die SAUK het die koerant nie ’n sent gevra om hul ontbyte regstreeks op SABC2 uit te saai nie.
Vroeër is berig dat Telkom in die 2012-’13-boekjaar altesame R12 miljoen opgedok het om 12 van dié sake-ontbyte te borg.
Dié onthullings kom in dieselfde week dat die Nasionale Energiereguleerder (Nersa) openbare verhore gehou het oor Eskom se voorgestelde kragverhoging van 16%.
Eskom se borgskap van die ontbyte van The New Age is betaal uit sy begroting vir die 49M-inisiatief vir energiedoeltreffendheid.
Gary Naidoo, woordvoerder van die Guptas, sê hy vind die fokus op sy kliënte “baie vreemd en oneties”.
“Dieselfde kliënte verskyn in jul koerant en dit lyk asof jul vrae gemotiveer word deur ’n vrees vir ’n verlies aan markaandeel. Dit blyk jul motief is om ’n afskrikmiddel te vind vir dié kliënte wat inkoop by ons visie van ‘trots Suid-Afrikaans’, en dat dit heeltemal onafhanklik is van die publikasie van gebalanseerde nuus.”
Die multimiljoenrand-borgskappe het aan die lig gekom in Gigaba se antwoorde in die parlement op vrae deur Kenneth Mubu, DA-LP. Mubu het gesê The New Age is ’n “ANC-nuusblad” en Transnet en Eskom se verhouding met The New Age tas die regering se beeld aan.
“The New Age se eienaars het ’n baie noue en gemoedelike verhouding met pres. Zuma,” het Mubu gesê.
Hy meen dis verkeerd dat die regering die koerant se sake-ontbyte finansier.
Zuma is ’n familievriend van die Guptas en Zuma se seun Duduzane dien in minstens nege rade saam met Gupta-familielede, waaronder dié van Sahara Holdings en Shiva Uranium.
Een van Zuma se vroue, Bongi Ngema, is die hoof van kommunikasie en bemarking by die Guptas se JIC Mining Services.
In November het Mail & Guardian berig daar is “drie stelle Gupta-vingerafdrukke” op ’n verband van R3,8 miljoen op eiendom in Waterkloofrif wat aan Ngema behoort.
Transnet en Eskom het die afgelope week hul borgskap van die ontbytsessies verdedig. Hilary Joffe, woordvoerder van Eskom, sê die maatskappy het besluit om die sessies te borg ná wedersydse besprekings wat ’n geruime tyd geduur het.
Transnet en Eskom beweer hul borgskap het “leierskap in denke” en “die noodsaak om krag te bespaar” aangemoedig, asook hul handelsnaam gebou.
Transnet het tussen Oktober 2011 en November verlede jaar meer as R8,5?miljoen aan advertensies in The New Age bestee, luidens dokumente in die besit van City Press, Rapport se susterkoerant.
Kaizer Kganyago, SAUK-woordvoerder, sê die ooreenkoms tussen die SAUK en The New Age is ’n “wen-wen-ooreenkoms omdat ons inhoud verkry wat ons help om die publiek in te lig”.