Britse dieretuine begin renosterstropers vrees
2012-02-04 22:11
- Artikelopsies
- Deel
- Kry Rapport op
Britse dieretuine en wildreservate stel nou nagwagte aan om hul renosters te beskerm.
Volgens The Independent was daar ’n vlaag van renosterhoringdiefstalle by museums oor Brittanje en Europa heen.
Renosterhorings is al meer as R300 000 per kilogram werd.
So is die horing van die renostertrofee, Rosie, wat sedert 1907 in die Ipswich-museum hang, verlede Julie afgesaag.
Die Britse owerhede het besef daar kom dalk ’n nuwe bedreiging toe ’n man probeer het om ’n renosterhoring uit Engeland na Asië te smokkel.
Dié horing is afgesaag toe ’n renoster in die Colchester-dieretuin aan natuurlike oorsake gevrek het.
Volgens statistieke van SANParke was daar verlede jaar 448 gevalle van renosterstroping in Suid-Afrika. Dit is die hoogste voorkoms nóg.
Mnr. Pelham Jones, voorsitter van die private renostereienaarsvereniging in Suid-Afrika, sê die Britte het rede tot kommer.
“Stropers is bereid om in klein, private wildplase in te kom om renosterhorings in die hande te kry. Hulle sal nie twee keer dink om in dieretuine toe te slaan nie.”