Broekloos op Gautrein, soos in 40 wêreldstede
2011-01-08 22:49
Dis tyd vir broeklosmaak op die Gautrein!
So meen ’n groepie vriende van die Oos-Rand wat mense op die sosiale netwerk Facebook uitgedaag het om vandag ’n broeklose (of romplose) treinrit mee te maak.
Maar let wel: Daar word van jou verwag om ordentlike onderklere aan te hê… So dis darem nou nie ’n kwessie van heeltemal uithaal en wys nie.
“Dis sommer net vir die pret,” sê mnr. Ben Pienaar (32), die broekloos-organiseerder.
Die Gautrein-rit is beplan in reaksie op ’n uitnodiging aan mense wêreldwyd om vandag ’n stoute treinrit mee te maak ter herdenking van die eerste broeklose treinrit in New York tien jaar gelede.
Die Facebook-vriende is genooi om by die Gautrein-stasie in Sandton op te klim.
Sodra hulle op die trein is, waai die broeke en rompe.
En by die Marlboro-stasie word daar afgeklim en aangetrek.
Pienaar erken hy weet nie hoe wettig die amper-kaal rit is nie. “Maar dit kan tog nie onwelvoeglik wees nie?
“As kaal bene jou ontstel, stel ek voor jy verlaat nie jou huis in die somermaande nie. In elk geval is ons ‘alternatiewe’ broeke soortgelyk aan rugbybroekies.”
Die broeklose treinrit is tien jaar gelede die eerste keer gedoen deur die sosiale groep Improv Anywhere, met die doel om hulself en die niksvermoedende publiek met allerlei manewales te vermaak.
Video’s daarvan word op YouTube gesit, waar Pienaar daarvan bewus geraak het.
“Hulle daag al die afgelope drie jaar stede wêreldwyd uit om dit ook te doen en ek dink dis tyd. Sowat 40 stede het aangedui dat hulle Sondag (vandag) broekloos op treine gaan ry.
“Ons wil mense vermaak en hul reaksie toets,” sê hy.
Een vrou het Pienaar gevra of sy haar kinders na die broeklose rit kan bring. “Ons sal seker maak ons trek nie voor kinders uit nie. As die broeke eers uit is, sal die kinders nie van beter weet nie. Dit gaan lyk of ’n klomp strandgangers verdwaal het.
“Hoe die ouers die situasie aan hul kinders gaan verduidelik, is ’n heel ander storie.”
Pienaar het 1600 uitnodigings gestuur en teen Donderdag het 50 mense dit aanvaar.
- Rapport