Bruilof gaan draai in dam
2010-03-13 23:20
- Artikelopsies
- Deel
- Kry Rapport op
Elke voornemende bruid is bang dat reën haar groot dag bederf.
Die pasgetroude mnr. Hoffmann van der Walt en me. Marli van der Walt (née Wentzel) het egter nooit kon dink hulle gaan pens en pootjies in die dam beland nie – en dit tydens die neem van die troufoto!
Nadat die paartjie verlede week by die Dragon Peaks-vakansieoord naby Winterton gekerk is, wou hulle ’n groot groepfoto saam die gaste op ’n houtdek met die Drakensberge op die agtergrond hê.
Almal was besig om rond te skuifel vir die foto toe hulle ’n aardige kraakgeluid onder hul voete hoor.
“Daar was nog ’n gespot oor wie dan so dik is dat die dek so kreun, toe protesteer die dek wéér onder sy vrag,” vertel me. Alet van der Walt, die bruidegom se suster.
“Die volgende oomblik het die houtstutte besluit genoeg is genoeg en reg agter die bruidspaar gebreek,” sê Alet.
Byna al die gaste “behalwe ’n handjievol wat soos vinke aan die houtreling gehang het”, het met ’n benoude gil in die water beland.
Mnr. Hubert Wentzel, die fotograaf en bruid se broer, kon darem een foto van die groep én die ramp neem voordat hy besluit het om liewer met die reddingspoging te help.
Die bruid se ma, me. Hester Wentzel, het met rolstoel en al gesink en moes blitsig uitgehaal word.
Van die jongste gas, ’n baba van 11 maande, tot die oudste, die bruid se ouma van 88 jaar, is deur enkele omstanders uit die water gehelp.
Slegs een gas, mnr. Christo van der Walt, is beseer toe ’n groot houtsplinter in sy bobeen gesteek het.
’n Paar jonges het die drywende skoene, handsakke en selfs ’n deftige hoed uit die dam gevis.
’n Bordjie dui aan dat die dam tot 4?m diep is, maar dit was aansienlik vlakker waar die dek gebreek het en slegs enkeles was heeltemal onder die water.
Nadat hulle weer veilig op droë grond was, het die bruidspaar doodluiters die fotograaf nader geroep om die fotosessie voort te sit.
Hoffmann se twee susters, mee. Alet van der Walt en Beppie van der Merwe, het hul nuwe skoonsus se sopnat en modderige sleep met ’n brandslang skoongespuit.
Die damduikery het gelukkig nie ’n spreekwoordelike nat kombers oor die huweliksonthaal gegooi nie.
Die bruidspaar kon nie vir kommentaar bereik word nie, aangesien hulle tans ’n welverdiende wittebrood in die hoofsaaklik droë Namibië geniet.
- Rapport