Chad het net oë vir haar
2012-10-01 06:16
En toe word Aspoestertjie se droom wragtig waar!
In ’n blink “koets” het Melanie Olhaus (17) gister gestraal toe die Olimpiese swemheld Chad le Clos haar na haar matriekafskeid vergesel het.
Dié blonde leerling aan die Hoërskool Glenvista in Johannesburg het Chad op 14 Augustus met sy terugkeer van die Londense Olimpiese Spele met ’n plakkaat gesmeek om haar metgesel na haar matriekafskeid te wees.
Chad het sowaar ingestem – én gisteraand sy woord gehou.
“Ek is so gelukkig,” het Melanie gesê toe sy haarself gistermiddag in die spieël sien nadat sy gegrimeer en aangetrek is.
In ’n pragtige donkerblou rok, ontwerp deur Gert-Johan Coetzee, het sy haar held ingewag vir haar sprokiesaand by die Birchwood-hotel in Boksburg.
Chad het in ’n blink Lexus by Melanie se huis in ’n kompleks in Bassonia opgedaag. Hy het sy bloedrooi das reggeskuif en gesê hy is op sy senuwees, maar óók opgewonde.
Ander inwoners van die kompleks het in verwondering na die toneel voor hulle gestaar.
“Ek sal nie met ander meisies dans nie, ek is saam met Melanie vir die aand. Ek sal dit net doen as sy my toestemming gee,” het Chad gesê toe hy en Melanie deur hul chauffeur weggery is.
Sy het nie eens ’n antwoord verwag toe sy die plakkaat by die lughawe omhoog gehou het nie, wat nog die jawoord, het Melanie destyds gesê. Die bewoording was: “Chad, will you be my matric dance date???”
Haar ma, Yolande, het glo met dié idee gekom omdat sy toe nog nie ’n metgesel vir die matriekafskeid gehad het nie.
“Melanie is ’n groot swemaanhanger en wou op ’n ander manier vir Chad terugverwelkom,” sê haar ma.
Maar tot hul ekstase het Chad gesê: “Ja, I think I can do that.”
Gisteraand het die groot geleentheid aangebreek.
“Chad het blykbaar tydens die Spele in Londen verskeie versoeke van meisies op sosiale media gekry om saam met hom op afsprake te gaan,” sê Yolande.
“Hy het toe vir die BBC gesê vir die eerste meisie wat hom in persoon vra, sal hy ja sê.”
Voor sy aankoms gister was Melanie die ene opgewondenheid. “Chad het my op ’n kol gevra of ek regtig saam met hom wou gaan, toe sê ek ‘natuurlik!’.
“Hy het my selfs gevra wat hy moes aantrek.”