Cosatu is op soek na bruin, wit lede

Cosatu is op soek na wit en bruin lede.

Dié ANC-alliansievennoot se geaffilieerde vakbonde verteenwoordig skaars 22 000 wit werkers – dit is 1% van sy ledetal van sowat 2,2 miljoen. Voorts is net 306 742 of 14% van Cosatu se lede bruin.

Luidens die vakverbond se voorlopige organisatoriese verslag wat gisteroggend bekend gestel is, moet ’n dringende veldtog van stapel gestuur word om Cosatu in ’n nie-rassige organisasie te transformeer.

Cosatu se ledetal het sedert 2009 met 230 000 gestyg. Tot 80% van die lede is swart; een uit elke vier werk vir die staat en die res is meestal verbonde aan vakbonde in die mynbedryf en vervaardigingsektor.

Cosatu erken in dié verslag wat oor ’n week op sy nasionale kongres in Midrand bespreek sal word hy “sit met ’n probleem” omdat die helfte van sy lede vanjaar in ’n meningspeiling gesê het “geweld” is die enigste manier om suksesvolle stakings te verseker.

Van die vakbondlede het gesê: “Die polisie is die oorsaak, want hulle lok stakers uit deur geweld te gebruik.”

Cosatu sal ook sy nuwe leiers op die kongres aanwys. Dit gaan na verwagting ’n strawwe stryd oplewer tussen Zwelinzima Vavi se bondgenote en diegene wat van dié hoofsekretaris ontslae wil raak.

Vavi se teenstanders meen hy is te krities en uitgesproke oor die ANC-regering se misstappe. Hy is die eerste persoon wat die term “roofdierstaat” gebruik het.

Vavi is blykbaar nie ten gunste daarvan dat pres. Jacob Zuma ’n tweede termyn as ANC-leier dien nie en Cosatu se leiersverkiesing word gevolglik as ’n kleedrepetisie vir die ANC se leiersverkiesing in Desember in Mangaung beskou.

Intussen sê Cosatu in sy verslag “ernstige uitdagings” staar hom in die gesig.

Die vernaamste is die “aanslag” deur splintervakbonde in die platinummynbedryf op die National Union of Mineworkers (NUM), Cosatu se grootste vakbond.

Die NUM is sedert die Marikana-myntragedie onder nog groter druk, veral van mynwerkers wat vertroue in die vakbond verloor het omdat hulle meen die NUM is uit voeling met lede se ellende.

Cosatu is voorts bekommerd dat ses uit elke tien lede ontevrede is met die salarisse wat vakbonde by die werkplek beding.

Dít is ’n ernstige aanklag omdat Cosatu se eie navorsing daarop dui werkers sluit meestal aan by vakbonde vir beskerming teen afdankings en vir beter salarisse, voordele en werkomstandighede.

“Die ontevredenheid is ’n resep vir wegbreek-groepe en splintervakbonde,” lui die verslag.