DA se Hartenbos kan soos ANC se Polokwane afloop
2010-02-13 23:17
- Artikelopsies
- Deel
- Kry Rapport op
Johann Maarman en Jan-Jan Joubert
Wat Polokwane vir oudpres. Thabo Mbeki was, gaan Hartenbos vir adv. Lennit Max wees.
Só voorspel DA-lede die toekoms van adv. Max wat aspirasies gehad het om Wes-Kaapse DA-leier te word, maar nou met langverlof is ná bewerings van seksuele vergrype.
’n Senior DA-lid het gisteroggend aan Rapport gesê: “Max gaan dieselfde pad loop as Mbeki. Hy is vir die DA ’n verleentheid en op Hartenbos gaan hy dit sien en hoor.”
Die DA se leiersverkiesing word op 5 en 6 Maart in Hartenbos naby Mosselbaai gehou.
Nóg ’n DA-lid het gesê: “Max is net breedsprakig.
“Hy bluf deur te sê hy het groot aanhang. Met die wolk wat nou oor sy kop hang, het hy nog meer vyande gemaak. Ons het nie meer respek vir hom nie.”
Mnr. Theuns Botha, provinsiale DA-leier en Wes-Kaapse LUR vir gesondheid, sê hy het in die laaste verkiesing amper 70% van die stemme gekry.
“Ek mik nou vir nóg ’n groter oorwinning. Ek dink ek gaan dié keer meer as 80% van die stemme trek.
“Ek gaan op die kongres ook geen geheim daarvan maak nie dat ek dr. Ivan Meyer (LUR vir maatskaplike ontwikkeling) in die toekoms as provinsiale leier wil sien. Dr. Meyer is gereed om die party in die Wes-Kaap te lei. My wens is dat hy dit sommer aanstaande jaar word.
“Ek sê dit onbeskaamd en dit het niks met sy velkleur te doen nie. Hy is ’n uitstekende leier en ’n man van inbors.”
Meyer het egter Vrydag aan Rapport gesê hy het besluit om hom nie vanjaar vir ’n leierposisie beskikbaar te stel nie. “Ek gaan egter in die toekoms staan vir ’n posisie. Ek wil eers vertroud raak met die binnewerkinge van die party.”
Rapport verneem die plan is om Meyer te koöpteer in die provinsiale uitvoerende bestuur, wat vir hom die deur sal open om die volgende premierskandidaat van die Wes-Kaap te word.
Daar is algemeen verwag dat Max hom aan die provinsiale leierstryd sou onttrek nadat beweringe van buite-egtelike verhoudings oor hom op die lappe gekom het, maar hy het aangedui hy bly in die wedloop.
Die Kaapstadse burgemeester, mnr. Dan Plato, het intussen ook sy naam in die hoed gegooi as provinsiale leier.
Plato se steun is egter só beperk dat sy uitdaging nie ernstig beskou word nie.
Mnr. Kobus Marais (LP, Worcester) is die enigste kandidaat wat rustig kan slaap. Hy is onbestrede as tesourier herkies.