DKD-lid kry bevel teen regstel-aksie
2012-08-26 00:06
- Artikelopsies
- Deel
- Kry Rapport op
’n Lid van die departement van korrektiewe dienste (DKD) het eergister ’n hofbevel in die arbeidshof bekom om die DKD van sy regstellende aksieplan te laat afsien.
Christopher February het vier jaar lank in ’n pos van senior staatsrekenmeester by die Voorberg-bestuursgebied in Porterville waargeneem, maar nadat hy ná onderhoude as die beste kandidaat vir die pos aangewys is, is hy steeds nie aangestel nie.
Hy het toe die hof gevra om die DKD te keer om voort te gaan met die advertering van die pos.
February het in sy aansoek gesê dit is omdat hy bruin is dat die DKD hom nie heeltyds in die pos wil aanstel nie.
In sy betoog het regter Robert le Grange gesê die vakbond Solidariteit (wat February verteenwoordig) het daarin geslaag het om ’n prima facie-saak vir onbillike diskriminasie te bewys.
Le Grange het gesê die DKD het teen February gediskrimineer op grond van sy ras. Hy het ook gesê die DKD wil absolute kwotas tot elke prys bereik strydig met die Wet op Billike Indiensneming.
Die DKD mag ook nie voortgaan om die betrokke pos te vul voordat die hofsaak wat Solidariteit namens vyf DKD-werknemers (insluitende February) by die arbeidshof aanhangig gemaak het, afgehandel is nie.
Die werknemers voer aan die DKD se toepassing van nasionale diensplanne is diskriminerend teenoor bruin mense.
Solidariteit het eergister aangekondig dat hy nog vyf sake teen die DKD se rasplan na die Kommissie vir Versoening, Bemiddeling en Arbitrasie verwys het. Dit bring die getal regstellende aksie-sake teen die DKD op tien te staan.
Daar is ook 31 sake teen die Suid-Afrikaanse regering.
Ingevolge die DKD se diensplanne moet die arbeidsmag in die Wes-Kaap die nasionale demografie weerspieël, wat beteken meer poste moet met swart werknemers en minder met bruines gevul word.
Dr. Dirk Hermann, uitvoerende adjunkhoof van Solidariteit, sê hulle verskerp die hofaksie teen die DKD.
“Ons voorsien dat al tien sake gekonsolideer sal word om dit die grootste saak teen regstellende aksie in Suid-Afrika te maak.”