DKD se geldhoof ruim vergoed omdat hy tender toestaan
2009-11-21 23:29
- Artikelopsies
- Deel
- Kry Rapport op
’n Huis van R1 miljoen, motors, oorsese vakansies, kontant en... ses Blou Bul-seisoenkaartjies.
Dít is die gunsies vir ’n senior amptenaar van die departement van korrektiewe dienste (DKD) waarvoor die belastingbetaler indirek moes opdok.
Parlementariërs het Dinsdag verstom geluister hoe dié amptenaar bewering gunste van sowat R2,1 miljoen in ruil vir ’n tenderkontrak van sowat R239 miljoen gekry het.
Adv. Willie Hofmeyr van die spesiale ondersoekeenheid (SIU) wou nie die name van die amptenaar óf die maatskappy bekend maak nie.
Volgens Hofmeyr het die SIU-ondersoek aan die lig gebring hoe ’n senior DKD-amptenaar ’n sleutelrol gespeel het om te verseker dat die onderneming in 2004 die tender gekry het.
Rapport het betroubaar verneem dat die amptenaar mnr. Patrick Gillingham, geskorste finansiële hoof van die DKD, is. Hy word steeds sy volle salaris betaal.
Die maatskappy is Bosasa, wat spysenieringsdienste by die land se sewe grootste tronke lewer.
Bosasa het dié reusekontrak gekry ten spyte daarvan dat sy naaste teenstander, Sechaba Catering Services, se totale tender 17% minder was. Bosasa het net 0,8% afslag, gelykstaande aan sowat R2miljoen, aangebied.
Me. Nosiviwe Mapisa-Nqakula, minister van korrektiewe dienste, het in ’n verklaring gesê die kwessie is na die nasionale vervolgingsgesag verwys. Strafregtelike en tugstappe sal teen die betrokkenes gedoen word.
Volgens haar het haar departement ook interne prosesse begin om die aanwysing van diensverskaffers te versterk – soos die SIU versoek het.
Mapisa-Nqakula sê voorts tugstappe is gedoen teen die werknemers wat in die SIU-verslag genoem is.
Bosasa het nie op navrae gereageer nie.
Mnr. James Selfe, DA-skaduminister van korrektiewe dienste, het die beweerde korrupsie as die skokkendste in sy 15 jaar as parlementslid beskryf.
“Ek gaan ook nog die DKD in die parlement laat antwoord oor waarom Bosasa onlangs ’n verdere verlenging van drie jaar op dieselfde kontrak gekry het.
“Dít terwyl die SIU-ondersoek na hulle aan die gang was.”
- Rapport