‘Dallas’ troef ander reekse

Kykers kan maar net nie genoeg kry van die doen en late van die Ewing-familie van Southfork nie.

Saam met Revenge spog Dallas met die grootste kykertalle van oorsese reekse op M-Net, sê Mpeo Makape, hoof van bemarking van algemene vermaak by M-Net.

Makape sê sy het nie presiese syfers nie, maar die kykertalle is beslis “bogemiddeld vir ’n program in daardie tydgleuf”.

Dallas word Dinsdae om 21:00 op M-Net uitgesaai en Revenge Donderdae om 19:30.

Makape skryf die gewildheid van die ­nuwe reeks daaraan toe dat die ou storielyn verder geneem word met ou, bekende karakters, maar ook met ­nuwe bloed.

Kykers kan steeds die hardebaarde soos JR (Larry Hagman) en Bobby (Patrick Duffy) in aksie sien, terwyl nuwe karakters soos John Ross (Josh Henderson) en Christopher (Jesse Metcalfe) sake net verder warm maak.

Wat plaaslike reekse en/of programme betref, is Carte Blanche en Idols SA die toptwee wat die meeste kykers lok.

* Die nuwe Dallas-reeks, wat reeds middel Junie in Amerika begin het, kry ook daar uitstekende terugvoering. Nie net is resensente van Entertainment Weekly en TV Guide beïndruk deur die storielyn en die karakters nie, maar kykers het laat weet hul Woensdagaande is nou gevul met Dallas.

In Brittanje lok die nuwe Dallas Woensdae meer as 3 miljoen kykers.

Die oorspronklike reeks is in 1978 die eerste keer uitgesaai. Dit word tot vandag toe nog gereken as een van die suksesvolste TV-reekse nog.