Danksy Die Antwoord pomp VSA in Afrikaans
2010-02-13 23:18
Met hul kru taal, eksplisiete lirieke en suggestiewe musiekvideo’s het ’n Suid-Afrikaanse musiekgroep so te sê oornag kultusstatus in Europa, Rusland, Australië en Amerika verwerf.
Dié ongewone groep glo hulle ís Die Antwoord – vandaar dan ook hulle naam.
Aanhangers en joernaliste van oor die wêreld heen – selfs die New York Times en Engeland se Guardian het al stories oor Die Antwoord gedra – google nou die betekenis van die woord “zef.”
Die kletsrymer Ninja en sy kamerade, Yo-Landi Vi$$er en DJ Hi-Tek, se zef rap-rave-liedjies het die afgelope tien dae die wêreld op horings geneem.
“Vier miljoenhits op die website, in net ’n week!” spog Ninja. “Ek moet ’n accountantkry, bra. Die record labelsis in ’n bidding warvir ons.”
Die Antwoord se webtuiste het inmekaar getuimel weens miljoene besoeke en dit moes inderhaas na ’n sterker bediener geskuif word.
Ninja sê hulle het “nodde f*k” hierdie skielike wêreldwye aanhang verwag.
“Ek dink dis omdat die styl so núút is,” sê Yo-Landi. “Dis nie gewone rap nie.”
“Die wêreld ly aan ’n oorvloed van inligting,” sê Ninja. “Hoe breek ’n mens deur dit? Ons het iets gemáák, iets wat soos ’n laser daardeur sny.”
Amerikaners wat nog nooit Afrikaans gehoor het nie, sing nou vir mekaar: “Wat pomp julle, wat pomp julle, wat pomp wat pomp wat poooomp.”
“Ons het in ons innerzef inge-tap,” sê Ninja. “Ons het al die ander konsepte weggegooi. Dis ’n geestelike ervaring.”
- Hoewel baie mense geskok sal wees oor die lirieke van Die Antwoord, sê sanger Valiant Swart dat die skokwaarde van vloekwoorde ’n truuk so oud soos die berge is.
“Ek glo daar is plek vir almal; alles vorm deel van kuns. Dit gaan nie altyd oor suiwer vermaak nie, maar party ouens is daarop uit om uit te daag,” sê hy oor Die Antwoord.
“En dis presies wat dié ouens nou doen. As mense uitgedaag word, dan dink en praat hulle oor goed.
“Robuuste debat is mos wat jy wil hê – dis immers een van die hoekstene van ’n werkende demokrasie.”
Valiant sê dat die groep vermaaklik is, is nie te betwyfel nie. “Hulle waarde is nét soveel as uitdagers en ontlokkers.”
- Rapport