De Klerk-sage: Nicole wil steeds die R33 000 hê

Oudpres. FW de Klerk se skoondogter wil hom steeds probeer dwing om sowat R33 000 per maand aan onderhoud vir sy twee kleinkinders te betaal.

Nicole Noordien de Klerk het Donderdag aan Rapport gesê sy gaan die saak nou na die appèlhof neem nadat die hooggeregshof in Johannesburg beslis het De Klerk hoef nie onderhoud vir sy seun se kinders te betaal nie. Dié hof het vroeër ná ’n dringende aansoek van De Klerk ook beslis dat sy geldsake vertroulik is. Dít nadat die Randburg-landdroshof gelas het dat hy sy persoonlike inligting aan die onderhoudslanddros moet openbaar nadat Nicole de Klerk daar ’n onderhoudseis teen hom ingedien het.

Nicole het aangevoer sy eis onderhoud van De Klerk omdat sy seun Willem, van wie sy aan die skei is, nie sy kinders kan onderhou nie. De Klerk sr. dra reeds vrywillig elke maand sowat R11 000 by tot sy kleindogters se onderhoud en skoolgeld.

Nicole het die afgelope week gesê sy was nie eens bewus van die hooggeregshof se uitspraak nie en “moes dit in die koerant lees”.

Volgens haar het sy Donderdag onsuksesvol by die regter probeer uitvind wat aangaan.

“Die hooggeregshof-geding was nie eens oor onderhoud nie, maar oor of FW de Klerk in die landdroshof moet verskyn of nie.”

Sy beweer die De Klerk-familie het iets teen haar. “Dit gaan egter nie oor my nie, maar oor die kinders. Hulle het nie eens ’n mediese fonds nie. ’n Ander man (haar kêrel by wie sy en die kinders in Sandton, Johannesburg, woon) moet nou vir die kinders sorg.”

Op die vraag of haar onderhoudseis nie buitensporig hoog is nie, sê sy: “My kinders is gewoond aan hul leefstyl. Ek wil net seker maak hul leefstyl word handhaaf. Iemand anders moet egter nou daarvoor betaal. Ek het al my spaargeld opgebruik om hulle aan die lewe te hou. Ek gaan nie rus totdat my kinders kry wat hulle verdien nie.”

Rapport verneem De Klerk sr., wat tans in die buiteland is, beskou die saak as ’n “private familie-aangeleentheid” en lewer nie kommentaar daaroor nie. Sy prokureur, Gerhard van Niekerk van die firma De Klerk & Van Gend in Kaapstad, het nie op navrae gereageer nie.

Luidens Sapa het regter Frans Kgomo in sy uitspraak vroeër in die hooggeregshof beveel dat ’n hof nie meer as een onderhoudsbevel aan dieselfde kinders kan toestaan nie. Dít nadat die Wes-Kaapse hooggeregshof in 2009 beveel het De Klerk jr. moet maandeliks R18 000 onderhoud vir albei kinders as onderhoud betaal.

Kgomo het ook daarop gewys dat De Klerk sr. reeds drie jaar lank sonder ’n hofbevel sy kleinkinders se skoolgeld en ’n bykomende R8 000 per maand betaal.