Dié ‘Konsert’: min plek oor 99% van kaartjies gou al opgeraap

Daar is minder as ’n maand oor voor die grootste Afrikaanse musiekgebeurtenis van die jaar.

Van 11 tot 13 Oktober gaan sowat 28 000 mense die Moreletapark-ouditorium in Pretoria vul vir Afrikaans is Groot 2012 – Dié Konsert.

Mense reis van Kaapstad, Port Elizabeth, Durban en selfs Namibië en Zimbabwe om dié onvergeetlike vertoning by te woon.

Die geleentheid word deur Pick ’n Pay geborg en Rapport en die tydskrif Sarie is die mediavennote.

Met 14 van die grootste name in die Afrikaanse musiekbedryf, onder wie Juanita du Plessis, Theuns Jordaan, Robbie Wessels, Bok van Blerk, Steve Hofmeyr en Bobby van Jaarsveld, is dit geen wonder nie.

Ander sterre wat gaan optree, is Jay, Karlien van Jaarsveld, Riana Nel, Lianie May, Jannie Moolman, Arno Jordaan, Corlea Botha en Jak de Priester. Dr. Victor is ’n gas en Nico Panagio en Diaan Lawrenson is die aanbieders.
’n Oorweldigende 99% van die kaartjies vir Afrikaans is Groot is reeds uitverkoop.

In die Oktober-uitgawe van Sarie, met Jay en Leanie op die voorblad, word met die 14 sterre gesels wat die aand gaan laat skitter. Die artikel strek oor nege bladsye met pragtige foto’s.

Kaartjies vir die drie aandvertonings is reeds uitverkoop, maar daar is nog enkele plekke beskikbaar vir die vertoning op Saterdag 13 Oktober om 12:00. Pryse wissel van R180 tot R395.

Laatslapers wat nog kaartjies wil bekom, moet vinnig spring. Vir meer inligting besoek www.afrikaansisgroot.co.za waar daar ook ’n skakel vir kaartjieverkope is.