'Die Stem' in die spervuur

 JOHANNESBURG. – “Die Stem” is “direk teenstrydig” met “Nkosi Sikelel’ iAfrika” en wat dit vir Afrikane beteken, en daarom moet die Afrikaanse en Engelse dele uit Suid-Afrika se nasionale lied verwyder word.

Dít is een van die voorstelle wat Cosatu dalk vandag op sy nasionale kongres in Midrand gaan oorweeg.

As dit weens ’n tydgebrek nie bespreek word nie, sal dit saam met ander onbespreekte voorstelle direk na die sentrale uitvoerende komitee gestuur word vir bespreking daar.

Die polisievakbond Popcru het die voorstel gemaak en dit word vervat in Cosatu se voorlopige beleidsdokumente.

Tydens die Codesa-onderhandelings in die vroeë negentigerjare is daar besluit om die Afrikaanse en Engelse dele by die nasionale lied in te sluit as ’n kompromie, lui die dokument.

“Die nasionale lied moet terug verander word na sy oorspronklike vorm. Die nasionale lied moet die stryd wat ons toekomstige aspirasies rig, verteenwoordig.”

“Die Stem” is onversoenbaar met Enoch Sontonga se oorspronklike weergawe van “Nkosi Sikelel’ iAfrika”, voer Popcru aan. “ ‘Nkosi Sikelel’ iAfrika’ is vandag nog ’n belangrike deel van die werkers se stryd en moet die enigste Suid-Afrikaanse nasionale lied wees.”

Die ooreenkoms om ’n deel van “Die Stem” en ’n paar Engelse reëls by Suid-Afrika se nasionale lied in te sluit ná 1994 was ’n versoeningsgebaar en is uit verskeie oorde geprys omdat dit verteenwoordigend is van Suid-Afrika se “reënboognasie”. Die ooreenkoms is ook by die Grondwet ingesluit en ’n grondwetwysiging sal dus nodig wees om aan die lied te verander.

Volgens prof. Marinus Wiechers, ’n grondwetkenner, sal dit egter teen die gees van die Grondwet indruis. “As hulle Afrikaans en Engels uit die Grondwet haal, gaan hulle teen die verklaarde doelstelling van die Grondwet en die Vryheidsmanifes wat lui Suid-Afrika behoort aan almal wat daarin woon.”

Nkosinathi Theledi, sekretaris-generaal van Popcru, wou nie gister kommentaar lewer oor die voorstel nie.