Die afrigter is baas en nie die spelers, sê Heyneke Meyer

Oor sy planne vir die Springbokke en die afrigtingspan wat hy in die oog het, rep Heyneke Meyer nie ’n woord nie.

Maar ná sy aanstelling Vrydag in Kaapstad as die Springbokke se nuwe hoofafrigter het Meyer in ’n eksklusiewe onderhoud met Rapport se Hanlie Retief die sluier so effens gelig oor ’n paar doelwitte wat hy vir die Bokke het.

“Ek wil eie wees aan myself, eie aan my land. Ek soek ’n eg-Suid-Afrikaanse span.

“Ons moet vergeet wat die wêreld sê. As ons óns rugby speel – strawwe, geharde Afrika-rugby – sal die wêreld ons respekteer,” het hy gesê.

Waaroor dit eintlik vir hierdie man gaan, hoor jy by almal, is nie die wen nie, maar die ménse: die kern van Meyer se rugby-evangelie.

“Ek wil glimlagte op kinders se gesigte sit, mense in ouetehuise gelukkig maak. Ek coach om ’n verskil aan mense se lewens te maak.”

Die “executives en daai” is ook belangrik, maar vir hom gaan dit primêr oor die rugby-publiek, veral die kinders: Hulle moet hul groen-en-goud-hempies met trots dra.

Die volledige onderhoud verskyn hier.

In ’n onderhoud met Sport24 se Stephen Nell het Meyer aangedui dat die Springbok-afrigter – en nie die spelers nie – voortaan die baas in die Bok-kamp sal wees... en die kaptein sal sy plek in die span moet verdien.

Meyer het ná sy aanstelling as Bok-afrigter aan Rapport gesê dat daar perke op spelerbemagtiging sal wees.

Daar behoort dus nie ’n situasie soos die onlangse een om John Smit – ’n kaptein wie se raklewe al in 2010 verstryk het – te ontstaan nie.

Nog berigte oor Meyer se aanstelling, asook ’n grafiese-uitbeelding van sy loopbaan as afrigter, verskyn in Sport24.