Die beste geweer: Innoveer
2012-10-20 23:37
Christine van der Westhuizen
“Dúúr skoolgeld.”
Dít is wat die transito-maatskappy G4S Suid-Afrika van Bryanston, Johannesburg, betaal het vir die ontwikkeling van sy nuwe vloot tegnologies gesofistikeerde pantservoertuie.
Volgens Albert Erasmus, besturende direkteur, is dit “nie onmoontlik nie, maar onwaarskynlik” dat een van dié voertuie beroof sal word.
G4S en die Britse reus in vlootbestuur, Imperial, het ’n huurkooptransaksie van R450 miljoen aangegaan waardeur Imperial 700 pantservoertuie in ’n tydperk van drie jaar aan G4S sal voorsien.
“Die voertuie se fisieke veiligheidskenmerke verskil nie veel van hul voorgangers s’n nie, maar die tegnologie is van die beste,” sê Erasmus.
Dié tegnologie vereis onder meer dat drie individue moet saamwerk voordat een van die kluise in die voertuig oopgemaak kan word.
“’n Voertuig laai byvoorbeeld geld by ’n bank af. Sodra dit binne die voorafbepaalde GPS-koördinate geparkeer is, druk die bestuurder ’n knoppie, die sentrale beheerkamer stuur ’n eenmalige kode en die wag agter in die kluiskompartement sleutel die kode in om die kluis oop te maak,” sê Erasmus.
Geen voertuig kan oopgemaak word as dit nie binne die voorafbepaalde ryverwysing staan nie en dit kan ook net by G4S-takke, banksentrums en sekere polisiekantore oopgemaak word.
Elkeen van die vier groot banke het sy eie kluis binne-in elke voertuig en ’n kluis van ENB kan byvoorbeeld nie by Standard Bank oopgemaak word nie.
“In die verlede kon rowers ’n voertuig omstamp of aan die brand steek nadat brandstof by die luggate ingegooi is. Nou is die wiel-aste en luggate só ontwerp dat dit nie meer kan gebeur nie.”
Sodra die ontsnapluik in die agterste kompartement geaktiveer word, sluit die voertuig af en inligting oor sy ligging word na die beheerkamer gestuur.
Bykomende maatreëls verseker dat die kajuit- en kluisdeure nie kan oopmaak as enige van die ander deure oop is nie.
Erasmus sê die transitobedryf het in 2007 ’n draaipunt bereik.
“Al die rolspelers het toe begin saamwerk en sedertdien neem rooftogte drasties af.”
Daar word veral meer klem op tegnologie geplaas, sê hy.
G4S is die grootste veiligheidsmaatskappy in Afrika en sowat 3 500 van sy 11 000 werknemers werk in Suid-Afrika.
