Die vele gesigte (en verhale) van Donovan Moodle

Donovan Moodley (31) sit al sewe jaar lank agter tralies weens die moord op me. Leigh Matthews.

Hy het eers skuld beken nadat die naakte lyk van Matthews suid van Johannesburg gevind is.

Sy is in Julie 2004 van die Bond-universiteit in Sandton ontvoer.

Hy is in 2005 tot lewenslange tronkstraf weens die moord gevonnis, ’n verdere 15 jaar weens ontvoering en nóg 10 jaar weens die afpersing van haar pa.

Moodley is nou terug in die hof en sê hy het nie die moord gepleeg nie.

Oktober 2004:

Moodley verskyn op aanklag van moord, ontvoering en afpersing in die Randburgse streekhof.

Hy is blykbaar gedryf deur ’n geldnood. Volgens Moodley het hy Matthews in die parkeerterrein van die kampus ’n saamrygeleentheid gevra.

Hulle het in haar motor geklim, waarna hy haar ontvoer het.

Nadat hy R50 000 van haar ouers geëis het, het hy Matthews na ’n verlate veld in Walkerville geneem waar hy haar een keer in die agterkop geskiet het, getuig hy.



Junie 2006:

Moodley doen weer aansoek om ’n herverhoor nadat sy vorige aansoek hiervoor in November 2005 misluk het.

Hier beweer hy daar was ’n sameswering teen hom en dat hy nie alleen by die moord betrokke was nie.

Hy sê die polisie het nie moeite gedoen om die ander skuldiges vas te trek nie.

November 2009:

Moodley vra die Johannesburgse hooggeregshof om sy lewenslange vonnis op grond van ’n tegniese punt te verwerp.

Hy sê daar was teenstrydighede in sy skuldbekentenis en regter Joop Labuschagne moes hom nie destyds skuldig bevind het nie.

Die hof beslis sy oorspronklike vonnis is gepas.

Januarie 2012:

Moodley doen nou aansoek om ’n herverhoor in die hooggeregshof in Johannesburg.

Hy voer aan drie dwelmsmouse (ene Frank, Allie en Jemba) het hom gedreig om by Matthews se ontvoering betrokke te raak.

Volgens hom moes hy toekyk hoe Jemba Matthews doodskiet.