Diefstal deur seinsteuring neem landwyd toe
2012-01-28 23:10
- Artikelopsies
- Deel
- Kry Rapport op
Hanri Wondergem in Johannesburg
Diewe wat motoriste met die gebruik van seinsteuring besteel, is besig om landwyd toe te slaan.
Meer as 40 gevalle van diefstal uit motors word weekliks by die polisie in Sandton in Gauteng aangemeld en duisende motoriste kla daagliks by die ombudsman vir korttermynversekeraars oor verliese weens diefstal uit motors deur seinsteuring.
Parkeerterreine by inkopiesentrums, laerskole waar ma’s uitklim om saam met hul kinders na klasse te stap en vulstasies langs besige snelweë word die teikenveld van misdadigers wat besittings uit motors steel sónder om by die motor in te breek.
By ’n Bloemfonteinse inkopiesentrum is ’n waarskuwingsbord opgerig, in Nelspruit word tot 30 voorvalle per week aangemeld en by vulstasies en restaurante langs die N4 tussen Johannesburg en die Krugerwildtuin word vakansiegangers en toeriste geteiken.
Selfone, skootrekenaars en inkopies word gereeld gesteel.
Seinsteuring (car-jamming) is besig om landwyd toe te neem en dit is byna onmoontlik om die diewe vas te trek.
Volgens mnr. Johan Lessing, bestuurder van Centurion Systems, ’n onderneming wat spesialiseer in die outomatisering van veiligheidsmaatreëls, word die vinger gewys na sekere handelsmerke en motorvervaardigers, maar dit kan eintlik met enigiemand gebeur.
Lessing verduidelik dat die meeste afstandbeheerders van motors, veiligheidshekke en motorhuisdeure op een van twee frekwensies, 403 MHz of 433 MHz, werk.
Dié frekwensies is deur die Onafhanklike Kommunikasie-owerheid van SA (Okosa) goedgekeur en is gratis beskikbaar.
“Jy hoef nie aansoek te doen om ’n lisensie om op die frekwensie te werk soos met ’n tweerigting-radio nie; dit staan bekend as ’n vry kanaal,” verduidelik Lessing.
Dit het tot gevolg dat die frekwensies baie besig is.
’n Motoreienaar druk die knoppie van die afstandbeheerder en neem aan die motor is gesluit en die goed daarin is veilig.
Intussen word die sein versteur deur ’n ander afstandbeheerder wat binne bereik is en op dieselfde frekwensie ingestel is. Die elektroniese ontvanger van die sein in die motor herken dan nie die sein wat gestuur word nie en die motor se deure staan oop vir diewe om te steel wat hulle wil.
“Dit hoef nie noodwendig die afstandbeheerder van ’n motor te wees nie, dit kan enige ander afstandbeheerder wees wat op dieselfde frekwensie werk.”
Kapt. Dennis Adriao, nasionale woordvoerder van die polisie, het bevestig seinsteuring is ’n landwye probleem wat gereeld voorkom.
Maak seker of versekeraar betaal
Volgens die Suid-Afrikaanse Versekeringsvereniging (Saia) rus die onus op die versekeringsmaatskappy of hy eise sal betaal waar seinsteuring betrokke was.
Die motoreienaar moet beleide en voorwaardes goed deurgaan om te verseker dat hul versekeraars vir die omstandighede voorsiening maak.
Baie versekeraars betaal nie uit vir diefstal uit motors as daar nie tekens van gedwonge toegang is nie, terwyl ander wel daarvoor voorsiening maak.
Hoe om dit te voorkom
As jou motor ’n geluid maak of die ligte flikker wanneer jy die knoppie van die afstandbeheerder druk, beteken dit die sein is ontvang en die motor is gesluit. Die beste is om aan die handvatsel te voel of dit gesluit is.