Dit gaan vrot by Gariep se visteelstasie
2013-02-02 23:26
- Artikelopsies
- Deel
- Kry Rapport op
Die toekoms van die omstrede visteelstasie by die Gariepdam in die Oranjerivier naby Colesberg, gebou ná beloftes van R100 miljoen van die Chinese regering, is onseker.
Annette Steyn, DA-woordvoerder oor landbou, het aan Rapport gesê dis doodstil in die splinternuwe gebou waar nog geen vissies geteel word nie.
Boonop wag vier Chinese kontrakteurs op die departement van landbou, bosbou en visserye om hul werk af te teken voordat hulle kan terugkeer huis toe en betaal kan word vir hul dienste in die Vrystaat.
Steyn het die teelplaas Woensdag besoek.
Volgens die projekplanne sou daar teen Desember met die eerste vingerlinge, of babavisse, begin teel word vir akwakultuurnavorsing, opleiding aan opkomende boere en voedselsekerheid.
Rapport het September verlede jaar berig dat die klimaat in die Vrystaat nie geskik is om tilapia te teel nie. Volgens die Chinese en Suid-Afrikaanse werkers met wie Steyn gepraat het, is hulle bekommerd omdat hulle intussen ook dieselfde verneem het. Dít terwyl die stasie by die Gariepdam spesiaal vir tilapia ingerig is.
Rapport het verlede jaar vasgestel van die werkgeleenthede wat geskep sou word deur die bou van die stasie het dadels gekom.
Selfs die meubels en rekenaars is van China.
Dié projek is luidens die departement van landbou die vlagskipprojek van ses akwakultuurprojekte wat aangepak is.
Dr. Mono Mashaba van die departement het in Augustus gesê dié projek is die verste gevorder van almal.
“Die gebou moet so spoedig moontlik aan die regering oorhandig word sodat die werk onmiddellik kan begin en die vorige teling (van karp en baber) hervat kan word,” het Steyn by navraag gesê.
Rapport verneem die oponthoud met die oorhandiging van die gebou sloer op hoë vlak in die departement.