Dok Lappies het 84 j. gelééf
2012-08-12 00:11
- Artikelopsies
- Deel
- Kry Rapport op
Marlene Malan in Kaapstad
Dr. Izak Labuschagne (84), een van die kleurrykste en bekendste persoonlikhede in Suid-Afrikaanse boks- en rugbykringe, is oorlede.
Labuschagne, wat in die sportwêreld as Dok Lappies bekend gestaan het, het Donderdagaand in ’n Kaapstadse hospitaal gesterf nadat hy ’n heupfraktuur opgedoen het.
Hy was een van Suid-Afrika se voorste oor-, neus- en keelartse – ’n loopbaan wat hy gekies het toe sy pa hom as jong student nie wou toelaat om ’n professionele bokser te word nie.
’n Maand gelede het Dok Lappies en sy goeie vriend, Kotie van Heerden, oud-bestuurder van die bokser Gerrie Coetzee, nog saam by Coetzee in Bloubergstrand ’n draai gemaak, het Van Heerden aan Rapport gesê.
“Hy was ’n fantastiese mens, ’n ou wat die lewe gelééf het – bekend, maar iemand wat vir die gemeenskap omgegee het – dít was Dok Lappies,” sê Van Heerden.
Labuschagne het op 75 afgetree, ná jare se praktisering in Alberton en Germiston.
Hy was onder meer voorsitter van die Transvaalse Boksbeheerraad, lid van die Suid-Afrikaanse Boksbeheerraad, spandokter vir die destydse Transvaalse rugbyspan, lid van die mediese komitee van die Suid-Afrikaanse Rugbyraad en die Internasionale Rugbyraad, en ere-president van die Transvaalse Rugbyunie en die Golden Lions.
Danksy sy passie vir dienslewering was hy in sy leeftyd by meer as 40 organisasies betrokke.
Tot diep in sy sewentigs het hy nog ’n aktiewe rol hierin gespeel, maar steeds daagliks spreekkamer toe gegaan om sy eerste liefde te beoefen, sê sy vrou, Margaret.
* Dok Lappies word oorleef deur vier kinders, agt kleinkinders en twee agterkleinkinders.
’n Gedenkdiens word Vrydag 17 Augustus om 15:00 in die NG Kerk Verwoerdpark, Alberton, gehou.