Dorp van die Jaar: Sabie hou makietie
2012-09-01 23:54
Die sangeres Juanita du Plessis sê die lekkerte van in kleiner dorpies optree is dat die mense so gasvry en vriendelik is.
En Sabie in Mpumalanga was verlede naweek geen uitsondering nie.
Sowat 3 500 feesgangers het dié dorp se nuwe status as Rapport en Kwêla se Dorp van die Jaar gevier. Die kompetisie is in samewerking met Leopard’s Leap aangebied.
“Ek word soos ’n prinses behandel,” het die gewilde sangeres van treffers soos Vlieg hoog gesê.
’n Optog van die Sabie-buiteklub het die grootste makietie in Sabie se geskiedenis ingelui.
Dít het ingesluit ou motors, fietsryers, Milo die bokkie wat vuur beheer en ’n brandweerwa, trompoppies en Wildebees-motorfietse.
Dan was Sarel van Sabie ook daar met al die ander sjefs van die dorp, ’n perderuiter en ’n vragmotor met ’n orkes op.
Die optog het by die Laerskool Sabie geëindig waar stalletjies en ’n reuse-markiestent opgerig is.
Plaaslike kunstenaars het deur die loop van die middag die gehoor aan die kuier gehou, waarna Juanita, die groep Adam (Reynardt Hugo, Joe Foster en Hugo Ludik) en Emo Adams en sy orkes die markiestent vol mense tot laat Saterdagaand laat feesvier het.
“Julle weet nie wat dié kompetisie vir die dorp beteken nie!” het Debbie Möller gejuig.
Sy was die voorsitter van die taakspan wat stemme vir Sabie gewerf het.
Met sy 71 902 stemme is Sabie ’n waardige wenner van die titel.
Lady Grey was tweede (64 677 stemme) en dan Prins Albert (62 759).