Dorp van die jaar: En die wendorp is...
2012-08-12 00:11
- Artikelopsies
- Deel
- Kry Rapport op
Sabie in Mpumalanga dra die kroon as Rapport en Kwêla se Dorp van die Jaar vir 2012!
Sabie het met 71 902 stemme die eerste plek verower, gevolg deur Lady Grey (64 677 stemme) en dan Prins Albert (62 759).
Clarens is in die vierde plek en Walvisbaai vyfde.
Die topvyf dorpe het elkeen méér stemme gekry as verlede jaar se wendorp, De Rust, wat in 2011 net oor die 39?000 stemme gekry het.
Vanjaar is meer as dubbel soveel geldige stemme as verlede jaar uitgebring, met 338 031 geldige stemme vir 2012 – en dit net in die eindronde.
Die volledige uitslag is:
Sabie: 71 902
Lady Grey: 64 677
Prins Albert: 62 759
Clarens: 49 184
Walvisbaai: 47 643
Schweizer-Reneke: 14 680
Hoedspruit: 11 794
St. Lucia: 8 006
Kathu: 7 386.
Karen Meiring, hoof van Afrikaanse kanale op kykNET, sê die groei in die belangstelling in die kompetisie is opwindend, asook om te sien hoe gemeenskappe hul eie kan omarm en saamstaan om ’n verskil vir hul dorpe te maak.
“Saam bou ons só aan almal se toekoms en welvaart.
“Die skep van ’n positiewe gees onder ons dorpenaars is ’n wonderlike geleentheid vir nasiebou.”
Meiring het al die mense wat soveel moeite gedoen het, gelukgewens met hul prestasie om in hierdie doel te slaag.
Pieter Cilliers, vervaardiger van Kwêla, sê die wedloop om die kroon was vanjaar die strafste nog.
“Kwêla se kykers en Rapport se lesers het verseker dat die Dorp van die Jaar-kompetisie elke jaar groter en groter word.
“Met meer as dubbel soveel geldige SMS-stemme in die eindronde as verlede jaar het die mense hul sê gesê en Sabie is ’n waardige wenner!
“Geluk ook aan Lady Grey en Prins Albert wat dit net-net nie gemaak het nie.”
Hy sê te oordeel na die geesdriftige deelname glo hy die kompetisie snoer gemeenskappe saam en help só van Suid-Afrika ’n beter plek maak.
Volgens Bokkie Gerber, redakteur van Rapport, is die aanwysing van Suid-Afrika se Dorp van die Jaar deur ons lesers en die kykers van Kwêla veel meer as net ’n kompetisie met ’n uiteindelike wenner.
“Dit wakker trots aan en verskaf die gom wat dorpsgemeenskappe saamsnoer in hul strewe om as die beste dorp in die land aangewys te word.
“Die rekord-stemgetal van bykans 350 000 in die eindronde van vanjaar se kompetisie is ook aanduidend van die trefkrag van die Dorp van die Jaar-titel.”
* Sabie, aan die voet van die Longtompas, is vinnig besig om een van die voorste bestemmings vir buitelewe-geesdriftiges te word.
Daar is selfs mense wat meen die 7 km van die Sabierivier waartoe hengelaars toegang het, is die beste plek in die land vir vlieghengel.
Sabie is lankal nie meer net ’n bosboudorp waardeur ’n mens ry op pad Krugerwildtuin toe nie.
Die dorp is in die laaste jare ’n bestemming op sigself.
In Sabie is daar nou ook toenemend toeroperateurs wat hulle toespits op die uitdagende deel van die buitelewe.
Nie almal wil by ’n brug afspring of teen ’n waterval afseil nie, maar ook vir hulle maak die dorp al hoe meer voorsiening.
Die dorp is klein en die strate kan te voet verken word.
Een van Sabie se bekendste gesigte is ds. Sarel Loots. Sarel is nie net predikant in die nabygeleë Graskop nie, hy was ook ’n finalis in die program MasterChef SA.
’n Mens kan in die dorp oorbly en op daguitstappies na die Blyderivier, Pelgrimsrus, God’s Window of die wildtuin gaan, almal binne ’n uur of twee se ry daarvandaan.