Drie regters kyk weer na kaptein se skop teen kop
2012-09-16 00:27
Julian Jansen in Kaapstad
Getuies wat saamsweer en assessore wat te wit is, het onregmatig gelei tot ’n gewese kaptein van die Delicious-rugbyklub in Ceres se skuldigbevinding ná die skopdood van ’n ander speler.
Dié aantygings is eergister in die hooggeregshof aangevoer in die appèlsaak van Ben Zimri, gewese rugbykaptein, teen sy skuldigbevinding aan strafbare manslag en tronkstraf van vyf jaar.
Andrew Craiger, advokaat vir Zimri, bevraagteken nou die regverdigheid van dié strafsaak waarin die staatsgetuies glo saamgespan het en die drie wit assessore “nie verteenwoordigend van die gemeenskap was nie”.
Zimri is in 2008 gevonnis nadat hy die losskakel van Rawsonville, Riaan Loots, op 23 Junie 2006 in ’n klubwedstryd met ’n stywe arm teen die strot getref en toe teen die kop geskop het. Loots is later breindood verklaar.
Met sy appèl het Zimri “’n berg om te klim”, het regter Ashley Binns-Ward, wat saam met regters Willem Louw en Rosheni Allie die appèlsaak aanhoor, gesê.
Hy het gesê die mediese bewyse strook met die getuienis van die staatsgetuies, en dat Zimri moes voorsien het hy kon Loots se dood veroorsaak het.
Craiger het toegegee Zimri se optrede was “gevaarlik”. Louw het gesê volgens die getuies het Zimri vir Loots “gaan haal, teruggetree en geskop”.
“Sou ’n redelike man kon sien dat hy dalk daardie persoon kon doodmaak?”
Zimri se rugbyloopbaan is verby en dit op sigself is ’n straf en sy kliënt moes eerder korrektiewe straf opgelê gewees het, het Craiger aangevoer. Hy wou ook weet watter les Zimri se tronkstraf moet uitstuur. “Dat daar ’n grens is aan waarmee mens kan wegkom,” het Louw geantwoord.
Binns-Ward het toe gesê dis opvallend dat Zimri van die begin af en tydens sy getuienis nooit berou getoon het nie.
Anthony Stephens, advokaat vir die staat, het gesê die verdediging was “onsamehangend” en het verwys na die “halfgebakte” teorie dat die oorledene vroeër in die wedstryd beseer is.
Die staat se getuies het op die regte tyd na die regte plek op die veld gekyk en iets so skokkend gesien dat dit hulle altyd sal bybly, het Stephens gesê.
Die bewering dat daar ’n sameswering teen die appellant was is nie bewys nie.
Uitspraak is voorbehou.
* Loots se ouers, Willie en Lana, het nie die hofverrigtinge bygewoon nie.