Du Plessis’s systap skuldeisers
2012-09-29 23:25
- Artikelopsies
- Deel
- Kry Rapport op
Die familietrust van die oud-rugbysterre Carel en Jacques du Plessis het hul rûe so “ge-cover” dat hy “boggerôl” van die geld teruggekry het wat hom toekom.
So sê Chris van der Vyver (51), ’n Oos-Kaapse boer en familievriend van dié bekende rugbybroers.
Carel, ’n oud-Bok-vleuel en -afrigter, en Jacques, ’n voormalige provinsiale speler, het eergister in verhore voor likwidateurs in die siviele hof in Bellville onder skoot gekom.
Winste van miljoene rande is glo uit die verkoop van ’n Swartlandse plaas gemaak terwyl skuldeisers oënskynlik sukkel om hul geld van ’n gelikwideerde maatskappy te verhaal. Die verhore word sedert verlede jaar gehou.
Die likwidateurs poog om te bepaal of die plaas se verkooptransaksie tussen die Du Plessis’s en Karel Botha, ’n gewese direkteur van die gelikwideerde maatskappy Pick ’N Gro Edms. Bpk., teen markwaarde geskied het en of dit tot voordeel van die maatskappy se skuldeisers was.
Van der Vyver sê hy het in 2008 R4 miljoen aan Botha, ’n jare lange vriend van hom, geleen.
Toe die maatskappy later in finansiële moeilikheid beland, is die plaas Mollenberg in 2010 vir R6,5 miljoen aan die Windmeul-trust, waarvan die Du Plessis-broers trustees is, verkoop.
Kort ná die likwidasie van Pick ’N Gro Edms. Bpk. het die Windmeul-trust die plaas vir R16,9 miljoen aan die Saamstaan-beleggingstrust verkoop.
Uit dié koopsom is toe sowat R12,6?miljoen aan die Jacques du Plessis-familietrust betaal.
Botha is intussen gesekwestreer en ’n verdere R2?miljoen is uit die koopsom aan die Dieprivier-trust (wat deur ’n familielid van Botha bestuur word) betaal.
Van der Vyver sê die Du Plessis’s het hom toe “?’n onaanvaarbare klein bedraggie” aangebied. Hy wou nie die spesifieke bedrag aan Rapport noem nie.
Van der Vyver, wat in die Somerset-Oos-distrik boer, is veral bevriend met die oudste Du Plessis-broer, Willie, ook ’n oud-Springbok.
Willie woon nou in Australië nadat hy lank op die Du Plessis-familieplaas naby Somerset-Oos geboer het.
Van der Vyver sê die Du Plessis’s het hulself onder meer met notariële verbande “ge-cover” sodat skuldeisers uitgesluit is.
Maar hy is nie kwaad vir die Du Plessis’s nie. “Ek wil net hê wat my toekom.”
Ryno Engelbrecht, ’n likwidateur, sê Botha het reeds verlede jaar getuig.
Die verhore is sedertdien verskeie kere uitgestel en is eergister hervat. Nog mense is gedagvaar om te getuig.
Grant Howard, die Du Plessis-broers se regsverteenwoordiger, het gister gesê die gelikwideerde Pick ’N Gro skuld Van der Vyver geld – nié die Du Plessis-familietrust nie.
Hy sê die Windmeul-trust het die plaas gekoop voordat Pick ’N Gro gelikwideer is. Derhalwe is die Du Plessis’s onder geen verpligting om enige skuld van die gelikwideerde maatskappy te vereffen nie.
* Die ondervragings word op 8 November voortgesit.