Du Preez vlieg hoog, val hard ná ‘bedrog’
2012-10-07 00:19
Julian Jansen in Kaapstad
Die koning van duiwe-wedvlug is onttroon nadat dit aan die lig gekom het sy kampioenduiwe het in wenplekke geëindig al het hulle glad nie eens in ’n wedvlug gevlieg nie.
Jan du Preez (57), ’n bekende boer van Douglas in die Noord-Kaap, het glo self ingegryp om te verseker dat sy duiwe telkens eerste oor die “wenstreep” is.
Dít het hy glo bewimpel deur voor ’n ren die mikroskyfie uit die duiwe se elektroniese ringe te verwyder. Dié skyfie aktiveer die elektroniese klok en registreer die tyd wanneer ’n duif ná ’n wedvlug by sy hok aankom.
Du Preez het glo die elektroniese ringe in sy hand versteek en by die eindpunt naby die klok stelling ingeneem.
Só het hy dan die “aankoms” van die duiwe elektronies ingeklok, lánk voor die werklike aankoms van die betrokke duiwe, sê ’n bron.
Sedert 2010 het sy “kampioene” klokslag die eerste en tweede plekke in wedvlugte losgevlieg.
Maar dié wonder-prestasies het die Suid-Afrikaanse Nasionale Posduif-organisasie (Sanpo) laat wonder. Die Noord-Kaaplandse Posduif-federasie het toe ’n ondersoek gelas na Du Preez, wat ook voorsitter was van dié federasie en agt jaar lank in Sanpo se bestuur gedien het.
In Julie is Du Preez lelik uitgevang toe beamptes sy duiwe stilletjies voor die wegspringpunt op Beaufort-Wes uit die wedvlug verwyder het.
Maar toe kom die Du Preez-duiwe wonderbaarlik wéér in die voorste plekke in Douglas aan!
Du Preez het die bedrog ten sterkste ontken.
Hy is lewenslank geskors, maar appelleer teen sy skuldigbevinding en skorsing. Die uitslag van dié appèl word binnekort verwag, sê Sanpo se voorsitter, Faunty Gillmer.
’n Spanmaat sê Du Preez se “kampioene” het by die R100 000 vir hom losgevlieg.
“Ek ys om te dink as oom Jan aan die Sun City Million Dollar-wedvlug deelgeneem het,” sê die spanmaat. “Daar is die wengeld vir die eerste plek R1,6 miljoen!”