ET se stem bulder weer
2010-05-23 00:26
Johannes de Villiers in Johannesburg
’n Bekende bulderstem klink op uit die graf.
Twee maande ná die dood van mnr. Eugène Terre’Blanche verskyn sy lewensverhaal eerskomende week in sy eie woorde.
Eugène Terre’Blanche: My storie is ’n outobiografie wat die AWB-leier met die hulp van die skrywer Amos van der Merwe voltooi het. Hy het die finale weergawe goedgekeur kort voordat hy vermoor is.
In die boek skryf hy ontroerend oor sy tronkdae, hy vertel hoe hy in sy laaste dae gereed was om militarisme af te sweer en hy onthul perspektiewe op van die mees omstrede episodes uit sy loopbaan (telkens met die bewering dat sy nederlae die gevolg van die NP, die media, oudpres. FW de Klerk en genl. Constand Viljoen se komplotte was).
Hy skryf onder meer oor:
- Die teer-en-veer van prof. Floors van Jaarsveld: Terre’Blanche beskryf dié voorval as die aanvang van sy openbare lewe.
- Sy vader, mnr. De Ville Terre’Blanche, het die teer-en-veerdery glo voorgestel en sy moeder het kussings oopgeknip om die vere te verskaf.
- Die Slag van Ventersdorp: Terre’Blanche “bewys” De Klerk het dié voorval georkestreer om die AWB ekstremisties te laat lyk en die NP in vergelyking “gematig”.
- Die inval van Bophuthatswana: Terre’Blanche beskryf sy onderhandelings met oudpres. Lucas Mangope, die vlug uit Mbabane en gif wat iemand hom na bewering die aand voor die skermutselings ingegee het. Weer eens maak hy die gevolgtrekking dat die AWB deur die NP soontoe gelok is (soos muise “op pad na die valletjie”).
- Ook die wyd gepubliseerde voorval toe drie AWB-lede tydens die vlug doodgeskiet is, is volgens hom deur die “ANC/NP-alliansie” georkestreer om die boodskap uit te dra dat Afrikaners wat vir hul regte opstaan “soos ’n bees met runderpes afgemaai” sal word.
- Die dag toe hy in Pretoria van sy perd afgegooi is: “Selfs die tronkstraf het my nie soveel geskaad as daardie stukkie nuus nie.
“Die spot en vernedering van daardie dag sal met my sterf, en seker ook nie eens dan nie.”
Tussendeur is daar talle kleiner onthullings, insluitende dat Terre’- Blanche glad nie so ’n groot aanhanger van Adolf Hitler was soos baie mense meen nie. “Hitler? Ag nee wat, kom ons wees nou realisties,” verklaar hy sarkasties.
Voorts vertel hy van die vriendskap wat hy in die tronk met ’n Tswana-man genaamd Thami gesmee het. “Ons twee het nog kontak en sal seker vriende bly so lank as wat ons lewe.”
Net die naam Jani Allen kom nêrens in die boek voor nie.
Terre’Blanche en Van der Merwe het meer as twee jaar lank saam aan die manuskrip gewerk.
Volgens mnr. Hendrik Venter van die boek se uitgewer, Griffel, sal die outobiografie ook as ’n e-boek te koop wees – blykbaar ’n eerste in Afrikaans.