Egpaar wil pleegkinders teen ‘onstabiele huis’ beskerm
2012-01-28 23:09
Marlene Malan in Somerset-Wes
’n Egpaar van Somerset-Wes wat in ’n hewige regstryd met die biologiese ma van hul twee pleegkinders gewikkel is, sê hulle sal liewer tronk toe gaan as om die kinders na ’n “onstabiele huishouding” terug te stuur.
Dit kom nadat die kinderhof op Somerset-Wes verlede week beslis het mnre. Daneall Lowe (41) en Ivo Indiani (36) van Somerset-Wes moet die kinders, ’n sesjarige seun en vierjarige meisie, ná twee jaar aan hul 42-jarige biologiese ma van Oos-Londen terugbesorg.
Die ma se naam word weerhou om die kinders se identiteit te beskerm.
Pas ná die hofuitspraak het die egpaar, wat hul eie haarkappersalon besit, en die twee kinders ’n week lank “weggekruip” om te keer dat die polisie en die ma die kinders uit hul sorg verwyder.
Hul prokureur, mnr. Philip Steyn van Somerset-Wes, het so gou moontlik appèl teen die uitspraak aangeteken.
Volgens Steyn “skort die appèl die hofbevel op. Die kinders kan dus nou eers bly waar hulle is.”
Lowe en Indiani het Steyn eers ná die geding aangestel.
Die ma het in Januarie 2010 onder eed verklaar sy en die kinders se pa, Lowe se broer, het toestemming aan die egpaar verleen om die kinders “vir ’n verlengde vakansie” by hulle te hou en met pleegprosedures te begin.
Die ouers, wat nooit getroud was nie, is uitmekaar en die kinders het saam met hul ouer broer en van hul susters by hul ma in Oos-Londen in ’n munisipale woonstel op die vierde verdieping gewoon.
“Die toestande in die woonstel was ver van ideaal. Dis ’n onstabiele huishouding waar daar soms nie eens kos was nie.
“Daar was geen veiligheidrelings voor die balkon nie,” sê Lowe.
’n Vriend van die egpaar wat die saak ondersoek het, het aan Rapport bevestig die twee kinders se een ouer sussie (8) is ook uit die ma se sorg verwyder en van die kinders is nooit skool toe gestuur nie.
Die sewe kinders het drie verskillende pa’s.
Lowe sê sy broer en ma, me. Mary Lowe, wat destyds op haar sterfbed was, “het ons gevra om die kinders uit die swak omstandighede te verwyder”.
“Ons het belowe. Ons het nie die staatstoelaes van R250 elk per maand vir die kinders geëis nie.
“Dis steeds aan die kinders se ma uitbetaal.”
Sy het die kinders sowat twee keer per jaar op Lowe en Indiani se koste in Kaapstad besoek.
Rapport het vasgestel ’n klag van huismoles en rusverstoring is al teen inwoners van die woonstel ingedien.
Lowe sê dit was nooit sy bedoeling dat die kinders van hul ouers vervreem word nie, net dat hulle die nodige sorg kry.
Hy en Indiani “versorg die kinders soos ons eie. Ons weier dat hulle teruggaan en opnuut getraumatiseer word.”
Volgens die egpaar is hulle al 15 jaar bymekaar en vier jaar gelede getroud.
Lowe sê hulle is nie ryk nie, “maar het albei ’n ordentlike beroep en gee ons kinders stabiliteit.
“Ons gee nie die kinders terug nie. Ek gaan liewer tronk toe.”