Fees haak so ’n bietjie vas (2 jaar lank)
2013-02-23 23:00
KARIN BURGER IN STELLENBOSCH
Het jy al die een oor Van der Merwe gehoor? Maar dié keer is dit nie ’n grap nie...
’n Van der Merwe-fees word vir 1 tot 3 Maart op die Backsberg-wynlandgoed buite Klapmuts in die Wes-Kaap beplan.
Volgens Nicolene van der Merwe, die organiseerder, word tussen 500 en 1 000 Van der Merwes verwag.
Nicolene is die dogter van die renjaer Sarel van der Merwe.
Nicolene sê hulle wou al twee jaar gelede so ’n fees hou ter viering van die 350ste jaar sedert haar naamgenote se aankoms in die land.
“Maar dinge het so ’n bietjie vasgehaak en nou vier ons 352 jaar in die land!”
Sy reël sedert 2011 heeltyds net aan dié fees.
“Ek het eers persverklarings die land vol begin stuur, waarna ek mense op Google en Facebook gesoek het. Ons het selfs Van der Merwes dorp vir dorp begin soek. Vandaar het die woord net versprei...”
Van die bekendste Van der Merwes wat reeds aangedui het hulle gaan die fees bywoon, is die renjaer Sarel en die sanger Wicus. Nicolene sê mense van so ver as Namibië en Australië het ook laat weet hul tasse is reeds gepak. Mej. Van der Merwe word Vrydagaand gekroon.
Daar is Saterdag toere na die plaas De Hoop, waar die Van der Merwe-monument is.
’n Kerkdiens sluit Sondag die fees af.
Nicolene se gunsteling-grappie oor ’n Van der Merwe? “Ek ken meer blondine-grappies as Van der Merwe-grappies,” lag sy.
* Vir meer inligting: www.vandermerwefees.co.za.
* Vir nog Van Merwe-nuus en -staaltjies, kliek hier.