Fietsry al meer gewild

Meer as ’n halfmiljoen fietse word jaarliks in Suid-Afrika verkoop.

David Bellairs, direkteur van die Fietstoer Trust en ook ’n lid van die Trapkrag Vereniging met sy 20 000 lede, sê dit sluit alle fietse in – van berg- en padfietse tot fietse waarmee kinders skool toe gaan.

“Daar was ’n dramatiese toename in die getal fietsryers oor die afgelope paar jaar.

Volgens hom neem sowat 85 000 fietsryers jaarliks aan allerlei wedrenne deel.

Kevin Vermaak, stigter van die Absa Cape Epic, sê die gewildheid van spesifiek bergfietsry het die afgelope tien jaar die hoogte in geskiet.

“Burry Stander was die ikoon van daardie groei. ”

Die aanlyn-inskrywings vir die 2013 Absa Cape Epic, een van die mees prestigeryke bergfietsrywedrenne in die wêreld, is binne 57 sekondes uitverkoop.

Sowat 1 200 fietsryers neem vanjaar deel.

Stander, ’n voormalige onder 23-wêreldkampioen, was die eerste Suid-Afrikaner om die Absa Cape Epic te wen, en wel in 2011. Verlede jaar het hy sy titel suksesvol verdedig, en vanjaar wou hy poog om ’n driekuns te behaal.

Bellairs sê dis moeilik om die presiese getal fietsryers te bepaal wat jaarliks op die land se paaie sterf.

“In 2011 is tussen 60 en 70 sterftes aangemeld. Ons het nog nie die getalle van 2012 nie. Die gemiddeld is tussen 60 en 100.”