Finish en klaar!

Mnr. Julius Malema se doppie is vir eers geklink.

Dié militante jeugleier is gistermiddag prakties uit die ANC en die ANC-jeug­liga geskop omdat sy appèl teen sy skuldigbevinding misluk het.

Mnr. Cyril Ramaphosa, voorsitter van die ANC se nasionale appèlkomitee, het Malema wel ’n tydelike reddingsboei gegee.

Malema kan binne 14 dae by die ANC se nasionale tug­komitee (NTK) om strafversagting pleit.

Sy regterhand, mnr. Floyd Shivambu, kan dieselfde doen.

Dit sal dus eers oor twee weke duideliker wees of die NTK volstaan by sy besluit om Malema vir vyf jaar uit die party te skop en of die vonnis ligter gaan wees.

En selfs nadat die NTK opnuut oor die vonnis besluit het, kan Malema weer by die ANC se nasionale appèlkomitee teen die NTK se uiteindelike vonnis appelleer.

Die ANC het egter ook die reg om by die NTK om verswarende omstandig­hede te pleit. Verskeie kommentators het gesê Malema dobbel dus met sy toekoms, want die NTK kan eindelik besluit om hom met ’n nóg swaarder vonnis te straf.

Daar was gister ná die buitengewone mediakonferensie in Luthuli-huis in Johannesburg groot verwarring oor of ­Malema sy tasse onmiddellik moet pak of nie. Van ANC-woordvoerders tot politieke ontleders het daaroor kleigetrap.

Mnr. Ismael Mnisi, ANC-woordvoerder, het vroegaand gesê daar sal groter duidelikheid wees soos die gebeure ontvou. “Wat die ANC se senior lede betref, is Malema se skorsing onmiddellik van krag,” het hy aan Rapport gesê.

Shivambu het die middag buite me. Winnie Madikizela-Mandela se huis in Soweto aan verslaggewers gesê hulle is nie paniekerig nie.
“Dit pla ons nie. Wat die jeugliga betref, gaan dinge soos normaal voort.”

Volgens Shivambu is Malema steeds lid van die ANC se nasionale uitvoerende komitee (NUK). “Hy sal beslis môre (vandag) by die NUK-vergadering se laaste dag wees.”

In Malema se tuisdorp, Seshego in Limpopo, het teenstanders vroeër groot feesgevier omdat die jeugleier se appèl misluk het en hulle het T-hemde met sy gesig daarop aan die brand gesteek.

Die opheffing van Malema se ANC-lidmaatskap spruit uit ’n klag in Mei 2010 toe Malema daaraan skuldig bevind is dat hy die statuur van pres. Jacob Zuma as partyleier en staatshoof ondergrawe het deur Zuma se leierstyl te kritiseer. Malema is destyds met R10 000 beboet en gewaarsku sy partylidmaatskap sal summier opgeskort word as hy binne twee jaar ’n soortgelyke oortreding begaan.

Dié opskorting het dus gister ingeskop omdat Malema se appèl teen sy skuldigbevinding op die twee nuwe aanklagte van November verlede jaar misluk het.

Ramaphosa het die appèlkomitee se uitspraak van 14 bladsye voorgelees en gesê 69 argumente is deur die appellante in vier appèlverhore gelewer. Die appèlkomitee het verskeie van die jeugleiers se argumente as “naïef, absurd en belaglik” bestempel.

’n Argument dat die klagte deur Zuma en mnr. Gwede Mantashe, ANC-sekretaris-generaal, teen Malema-hulle ingedien is om polities met hulle af te reken, is ook verwerp.