Gautengse DA-leier pak Zille dalk in November

John Moodey, Gautengse DA-leier, oorweeg dit om Helen Zille uit te daag wanneer die DA in November sy nuwe nasionale leiers kies.

Moodey is genader om hom verkiesbaar te stel – nie net om Zille as nasionale DA-leier te vervang nie, maar ook vir die amp wat dr. Wilmot James, ’n Zille-bondgenoot, as voorsitter van die party beklee.

Moodey het gesê onbestrede posisies is ’n onding en hy het baat gevind by sy eie leierstryd vroeër vanjaar.

“’n Leiersposisie kan nie ’n aanstelling wees nie, ’n mens moet verkies word. Glo my, posisies gaan uitgedaag word,” het hy gesê.

Moodey het nog nie vas besluit om hom verkiesbaar te stel nie.

“Ek toets nog die water, maar ek is oop vir die idee,” het hy aan Rapport gesê.

Ander Zille-bondgenote gaan op die opposisieparty se nasionale kongres in Boksburg geteiken word. Rapport het van verskeie bronne uit ses provinsies verneem ook die ampte van voorsitter van die federale raad wat die afgelope 12 jaar deur James Selfe beklee word én die drie adjunkvoorsitters van die party gaan “beslis uitgedaag word”.

Die kongres wat op 23 November in Soweto vir die sowat 1 700 mense gehou sou word, is nou na Birchwood in Boksburg geskuif omdat onderhandelings met die Universiteit van Johannesburg-kampus in Soweto misluk het.

Zille het haar Donderdag in Kaapstad amptelik verkiesbaar gestel.

Volgens Jacques Smalle, DA-leier in Limpopo, is Zille die geskikste persoon om die DA tot 2014 te lei.

Sy is die DA se handelsmerk en wapen, sê Anchen Dreyer, een van drie adjunkvoorsitters.

Intussen het Moodey gesê hy sal enige kandidaat uit Gauteng vir Zille se pos steun.

Athol Trollip, DA-leier in die Oos-Kaap, oorweeg een van twee voorste posisies – die voorsitterskap of Selfe se posisie as federale raadsvoorsitter.

Zille, James en Selfe is van die Wes-Kaap. Die drie adjunkte is Dianne Kohler Barnard (Kwa­Zulu-Natal), Dreyer (Gauteng) en dr. Ivan Meyer (Wes-Kaap).

Meyer, wat onbestrede benoem is as Wes-Kaapse DA-leier (die kongres is oor twee weke), gaan op sy provinsiale leierskorps fokus. Hy het Bonginkosi Madikizela, LUR vir behuising in die Wes-Kaap, benoem om sy posisie as adjunkvoorsitter oor te neem, wat Madikizela aanvaar het.

Rapport het verneem Joe McGluwa, OD-leier in die parlement, en Makashule Gana, DA-jeugleier, is ook vir dié posisie beskikbaar.

Dreyer en Kohler Barnard is albei weer verkiesbaar.

Meyer meen “dié uitdagings” is goed. Hy steun Wilmot James openlik.

“Wat my betref het jy ’n goeie politieke leier met ’n institusionele geheue as voorsitter van die federale raad nodig. James (Selfe) het gesag. Hy dwing dissipline af.”

Benoemings vir die nasionale leiersposisies sluit op 15 Oktober.