Gé se ‘Hoor my lied’ joune
2012-01-28 23:14
Christine van der Westhuizen in Johannesburg
Rapport-lesers kan op Sondag 19 Februarie ’n geskenkpakkie verwag, want hulle kry die romantiese tranetrekkerfliek van die 1960’s Hoor my lied in DVD-formaat saam met hul koerant.
In Hoor my lied speel die sanger en akteur Gé Korsten die rol van ’n wewenaar-dokter wie se sig aangetas is ná ’n motorongeluk waarin sy dogtertjie, Marietjie (Lindie Roux), verlam is.
Lydia de Graff (Helga van Wyk), ’n verpleegster, ontferm haar oor die dogtertjie en raak verlief op die dokter.
Die drie gaan oorsee vir Marietjie se behandeling en die dokter begin konserte hou om geld daarvoor in te samel.
Elmo de Witt was in 1966 regisseur van die rolprent en dit is in 1967 deur Kavalier Films uitgereik.
Martin Pols, beter bekend as die fotoboekieheld Mark Condor, het destyds die verpleegster se verwaande verloofde gespeel en Min Shaw was kortstondig te sien as die dokter se vrou.
Van Wyk was in 1966 Tuks se Joolkoningin en 20 jaar oud toe die fliek gemaak is. Sy onthou De Witt as “’n saggeaarde man wat ’n goeie aanvoeling gehad het van wat om aan Suid-Afrikaanse gehore te bied”.
“Gé was ’n baie goeie vriend van my, hoewel hy 15 jaar ouer was. Dit was vir my ’n groot voorreg om saam met hom te werk,” sê sy.
“Hy was teen daardie tyd al ’n bekende persoon, in teenstelling met my. Hy was natuurlik my held!”
Sy onthou Roux as “’n wonderlike, uiters talentvolle kind”.
Korsten het in 1999 selfmoord gepleeg en De Witt is verlede jaar in Maart oorlede.
* Hoor my lied het destyds naas The Sound of Music die meeste geld in Suid-Afrika gemaak en was die eerste Afrikaanse rolprent wat meer as R1 miljoen by die loket verdien het in ’n tyd toe ’n kaartjie maar 45c gekos het;
* Daar is nege maande daaraan geskiet; plaaslik en in New York;
* Dit was Korsten se eerste hoofrol. Hy het voorheen in Kruger miljoene gespeel en was daarna ook in Lied in my hart en Lokval in Venesië te sien;
* Die klankbaan, met liedjies soos Die A,B,C, Die Heidelied en Funiculi, funicula, was besonder gewild en het goue status behaal.