Gee ons geld, vra mense van Richtersveld
2012-08-12 00:10
Julian Jansen in Kaapstad
Die Richtersveldgemeenskap gaan miljoene van die regering vra om die sosio-ekonomiese agteruitgang in dié droë streek te help stuit.
Op ’n vergadering in Sanddrift is besluit om die regering en die mynmaatskappy Alexkor te nader om sowat 40% van die R190 miljoen wat nog in ’n trust bewaar word, uit te betaal aan die Richtersveld-gemeenskapseiendomsvereniging (GEV).
Voorts is besluit om dele langs die Oranjerivier vir bewaringdoeleindes opsy te sit en dat die ontwikkelingsplan, wat destyds deur die gemeenskap opgestel is, uitgevoer moet word.
Die GEV en agt ander restitusie-groepe bestuur tans die bates en ontwikkeling van die streek en die vier dorpies Kuboes, Lekkersing, Sanddrift en Eksteenfontein. Een van die groepe, die Richtersveld-landboumaatskappy, is intussen gelikwideer.
Die Richtersvelders was op 12 Oktober 2007 in die wolke toe ’n historiese en suksesvolle grondeis in ’n skikkingsooreenkoms met die Alexkor-mynmaatskappy en die regering bereik is. Toe is verskeie plase, R190 miljoen, en R45 miljoen van Alexkor vir die huur van grond aan die inwoners in ’n trust geplaas.
Nou sê die inwoners hulle ontvang ’n “armsalige” R4 500 uit jaar-dividende.
Die GEV bly ’n kookpot van ongelukkigheid en baie inwoners glo steeds hul leiers het met die grondeis baie te min aanvaar.
* Die departement van landelike ontwikkeling en grondhervorming het pas ’n verslag voltooi oor die stand van sake in die Richtersveld se GEV en die ander groepe.
Nomfundo Gobodo, hoof- grondeisekommissaris, sê slegs 30% (R63,3 miljoen) van die R190 miljoen is al uitbetaal.