Geneser vas oor kop in emmer op sy dak
2012-07-07 23:31
- Artikelopsies
- Deel
- Kry Rapport op
’n Tradisionele geneser is gister in Noordwes in hegtenis geneem nadat die kop van ’n vermiste man in ’n emmer op sy huis se dak gevind is.
Brig. Thulani Ngubane, polisiewoordvoerder, sê polisielede is Maandag na ’n begraafplaas in Lobaleng ontbied nadat munisipale werkers op die onthoofde lyk afgekom het.
Die polisie het gister inligting opgevolg wat hulle na die geneser se huis in Makwassie Hills naby Wolmaransstad gelei het.
By hul aankoms het hulle ’n emmer op die huis se dak gevind. Daarin was ’n mens se kop in plastiek toegedraai.
“Die kop het verskeie beserings gehad. Die geneser het glo verduidelik een van sy vriende, ook ’n tradisionele geneser van Rustenburg, het hom gevra om vir hom ’n kop van ’n dooie mens te reël,” sê Ngubane in ’n verklaring.
Die geneser en twee ander beskuldigdes is gister in hegtenis geneem en sal binnekort op aanklagte van die skending van ’n lyk en ’n begraafplaas in die hof verskyn.