Geraamtes in Kuba se koskas
2013-02-23 23:04
Haar seun het verlede jaar 30 kg in drie maande verloor weens die “swak” voeding in ’n Kubaanse universiteitskoshuis, sê ’n bekommerde ma in die Noord-Kaap.
Haar seun, ’n mediese student wat liewer anoniem wil bly, was een van die 187 studente wat Dinsdag in hegtenis geneem is nadat hulle na die Suid-Afrikaanse ambassade in Havana opgeruk het om ’n griefstuk oor die “slegte” koshuiskos te oorhandig.
Donderdag het die student in ’n SMS aan sy ma laat weet: “Ma ek lewe darem nog (maar) is nie juis happy nie...”
Ontbyt, volgens hom, is “’n broodjie, middagete rys en eier en aandete soja en rys”. Hy het nou iemand in ’n naburige dorp gekry om vir hom kos te kook.
“Toe die organiseerder vir die Noord-Kaapse studente verlede jaar in Kuba was en hy my seun sien, het hy hom ‘doodgeskrik’.
“Eers tóé besef ek hoe geweldig swak die kos is,” sê die ma.
Sy stuur maandeliks geld “vir beter kos” aan haar seun, sê sy.
“Die regering moet ingryp. Suid-Afrika ploeg geld in Kuba in en het ooreenkomste met die land.
“Ja, hulle besoek die land, maar maak nie kontak met die studente nie.”
Die studente staak al van 7?Februarie af en eis onder meer dat hul sakgeld van R1 700 per maand tot R6 200 verhoog word en dat ’n gesondheidsattaché in Kuba aangestel word.
Verlede week was hulle vier dae lank sonder kos omdat die gesondheidsdepartement glo nie die kosrekening betaal het nie, beweer die studente.
As daar nie aan hul eise voldoen word nie, sal hulle terugkeer huis toe, dreig hulle.
Sowat 1 200 Suid-Afrikaners uit armer gemeenskappe studeer in Kuba met beurse van die gesondheidsdepartement.
Dr. Aaron Motsoaledi, minister van gesondheid, het nou in briewe aan die studente die staat se posisie verduidelik.
Dolly Waterboer van Pofadder sê haar seun Roland (24), ’n vyfdejaarstudent aan die Villa Clara- mediese universiteit in die stad Santa Clara, het nou eerder ’n huis gehuur en kook sy eie kos.
“Ek kry swaar, maar stuur soms geld – my kind moet gesond eet. Die regering moet darem vir my meer inligting gee,” sê Waterboer.
* Joe Maila, woordvoerder van Motsoaledi, het eergister gesê die studente se staking was “onwettig”.
Die regering gaan nie die toelaes verhoog nie.
Die aanstelling van ’n attaché is goedgekeur, maar hy kon weens ander verpligtinge nog nie vir diens aanmeld nie.
Dr. Blade Nzimande, minister van hoër onderwys en opleiding, sê die studente is ondankbaar en kan gerus terugkeer aangesien daar baie ander is wat hongerder as hulle is vir die geleentheid.