‘Gewalg’ deur Zuma se voorstel oor moraliteit

René-Jean van der Berg

“Vir pres. Jacob Zuma om ’n beraad oor kulturele en tradisionele kwessies en moraliteit te hou is so goed die AWB hou ’n beraad oor rassisme.”

Dít was prof. Jonathan Jansen, rektor van die Vrystaatse Universiteit (UV), se reaksie op Zuma se versoek aan tradisionele leiers om moraliteit onder die loep te neem.

Jansen het in Johannesburg deelgeneem aan die Suid-Afrikaanse Instituut vir Rasseverhoudinge (SAIRV) se gesprek oor die morele verval in die land.

“Ek is gewalg dat hý (Zuma) so iets kon voorstel,” het Jansen gesê teen die agtergrond van die heftige openbare debat oor Zuma se buite-egtelike kind. Zuma het nou 20 kinders.

“Waar trek hy die lyn tussen poligamie en promiskuïteit?”

Jansen het Zuma en ander politici se verknogtheid aan weelde uitgelig as ’n verdere voorbeeld van morele verval. Hy glo “ ’n kultuur van parasitisme, korrupsie en morele verval” laat die regering in Suid-Afrika misluk.

“Die jeug neem dikwels besluite op grond van wat hulle om hulle sien gebeur. Suid-Afrika is tans in ’n baie gevaarlike situasie.”
Jansen sê wit én swart Suid-Afrikaners het hul vertroue in die regering begin verloor: “Ek is een van hulle.

“Protesoptogte is ’n duidelike bewys van die vertrouensverhouding wat nie meer bestaan nie. Boonop is dit lank nie meer die regering wat die land aan die gang hou nie, maar nie-regeringsorganisasies wat intree waar mense nie meer kos het om te eet nie.”

Jansen sonder onderwys uit as ’n groot probleem. “Hoe het pres. Nelson Mandela se land in dié krisis beland?”

Volgens hom is die pad na herstel nie maklik nie en het die regering nie die vermoë om dit te doen nie. “ ’n Oplossing vir die Suid-Afrikaanse krisis hang al meer van onafhanklike organisasies af.”

“Ek het lank en hard oor hul lot gedink... het ons die reg om opvoeding van studente te weerhou?” sê Jansen oor sy uitnodiging aan die vervaardigers van die Reitz-walgvideo om hul studies aan die UV te hervat.

Drie van die vier Reitz-studente was verlede week weer in die hof, waar hulle gehoor het hul verhoor word in Julie hervat. Dít kom nadat ’n versoeningsproses buite die hof misluk het.

“As die studente nie die ‘ontgroening’ van die koshuiswerkers verfilm het nie, sou niemand hiervan geweet het nie. Ek is seker sulke voorvalle kom ook by ander universiteite voor, maar niemand weet daarvan nie.”

Jansen sê die UV is die mees geïntegreerde universiteit in die land. “In al ons koshuise geld ’n 50/50-integrasiebeleid.”